پاکستانی انٹرنیٹ صارفین نے 2024 میں گوگل پر کیا سرچ کیا ، کمپنی نے ٹاپ سرچ ٹرینڈز کی تفصیلات جاری کر دیں۔ ان سرچنگ ٹرینڈز سے پاکستانی گوگل صارفین کی آن لائن ترجیحات کا پتا چلتا ہے۔
رواں سال کرکٹ نے پاکستانی سرچ ٹرینڈز میں اہم مقام حاصل کیا، جہاں آئی سی سی ٹی20 ورلڈ کپ اور پی ایس ایل 2024 کے شیڈولز سب سے زیادہ تلاش کیے گئے۔ اس کے ساتھ ساتھ کھلاڑیوں جیسے کہ شعیب ملک اور ساجد خان کی تلاشوں نے بھی ملک میں کرکٹ کے جنون کو ظاہر کیا۔
اولمپک سونے کے تمغے کے فاتح ارشد ندیم نے بھی پاکستانی صارفین کی بڑی توجہ حاصل کی، جب انہوں نے تیس برس بعد ملک کے لیے پہلا سونا جیتا۔
یہ جوش و جذبہ صرف کھیلوں تک محدود نہیں رہا، بلکہ میڈیا کی شخصیات، جیسے کہ ثناء جاوید اور زویا ناصر، بھارتی کاروباری شخصیت مکیش امبانی، اور سوشل میڈیا کی مشہور شخصیات حریم شاہ اور مناہل ملک کی سرچ نے بھی اس رجحان کو مزید اجاگر کیا۔
انٹرٹینمنٹ میں پاکستانی ڈرامے جیسے کہ "عشق مرشد” اور "کبھی میں کبھی تم”، سرچ میں نظر آئے۔
اس کے علاوہ بالی ووڈ کی فلموں "اینمل”، "ڈنکی”، "بھول بھولیا 3″، اور "استری 2” نے بھی خاصی مقبولیت حاصل کی، ساتھ ہی ریئلٹی شو "بگ باس” اور متوقع "مرزا پور سیزن 3” نے بھی صارفین کی دلچسپی بڑھائی۔
ٹیکنالوجی کے شعبے میں، "جمینی” اور "ریمیکر اے آئی” کی تلاشوں نے مصنوعی ذہانت کے ٹولز میں بڑھتی ہوئی دلچسپی کو ظاہر کیا۔