ورلڈ ہیلتھ آرگنائزیشن نے منکی پوکس وائرس کیلئے پہلی ویکسین کو استعمال کیلئے منظور کر لیا۔
میڈیا رپورٹس کے مطابق عالمی ادارہ صحت نے منکی پوکس کی پہلی ویکسین ایم وی اے، بی این کی منظوری دی ہے۔ یہ ویکسین 18 سال یا اس سے زائد عمر کے افراد کو 4 ہفتوں کے فرق سے 2 خوراکوں میں دی جا سکے گی۔ منظور شدہ ویکسین وائرس کے خلاف ایک خوراک کے بعد 76 فیصد اور 2 خوراکوں کے بعد 82 فیصد موثر ہے۔
ڈنمارک کی کمپنی کی بنائی گئی اس ویکسین کو 2022 میں عالمی سطح پر منکی پوکس کے پھیلنے کے بعد سے یورپ کے ساتھ ساتھ امریکا اور دیگر اعلی آمدنی والے ممالک کے ریگولیٹری حکام نے منظوری دے دی ہے۔ لیکن کم اور درمیانی آمدنی والے ممالک ڈبلیو ایچ او پر انحصار کر رہے ہیں۔
خیبرپختونخوا میں ایک شخص کے مثبت ٹیسٹ کے بعد پاکستان میں منکی پوکس کے کیسز کی کل تعداد پانچ ہوگئی ہے۔
کے پی کے وزیر صحت قاسم علی شاہ نے اعلان کیا کہ پشاور کے ایک 33 سالہ رہائشی میں اس بیماری کی تشخیص ہوئی ہے۔ مریض، جو 7 ستمبر کو سعودی عرب سے واپس آیا تھا، خیبر ٹیچنگ ہسپتال میں تشخیص ہوا اور اس وقت لوئر دیر میں اپنے گھر میں تنہائی میں ہے۔
منکی پوکس کے بڑھتے ہوئے معاملات کے جواب میں، نیشنل انسٹی ٹیوٹ آف ہیلتھ نے وائرس کے عالمی پھیلنے کے بارے میں ایک ایڈوائزری جاری کی ہے۔