جنگ ابھی شروع ہوئی ہے،آپریشن خطرناک اور پیچیدہ،پینٹاگون کی ہنگامی بریفنگ،ایران پر بھرپور وار جاری،جنگ طویل ہونے کا اشارہ

واشنگٹن(ایگزو نیوز ڈیسک)امریکا کے وزیر دفاع پیٹ ہیگستھ نے ایران کے خلاف جاری جنگی کارروائیوں پر بریفنگ دیتے ہوئے دعویٰ کیا ہے کہ امریکا اس وقت جنگ میں برتری حاصل کیے ہوئے ہے اور ایک ہفتے کے اندر ایران کی فضائی حدود پر مکمل کنٹرول حاصل کر لیا جائے گا۔ انہوں نے کہا کہ مشرق وسطیٰ میں مزید امریکی افواج پہنچ رہی ہیں اور کارروائیاں پوری شدت سے جاری ہیں۔
وزیر دفاع کے مطابق امریکی افواج ایران پر بھرپور حملے کر رہی ہیں اور ایرانی دفاعی نظام کو شدید نقصان پہنچایا گیا ہے۔انہوں نے دعویٰ کیا کہ بحر ہند میں ایرانی جنگی بحری جہاز کو ڈبو دیا گیا ہے تاہم ان دعووں کی آزاد ذرائع سے تصدیق نہیں ہو سکی۔انہوں نے یہ الزام بھی عائد کیا کہ ایرانی قیادت نے سابق امریکی صدر ڈونلڈ ٹرمپ کو قتل کرنے کی کوشش کی تھی۔وزیر دفاع کا کہنا تھا کہ ایران میں ایک سکول پر ہونے والی مبینہ بمباری کی تحقیقات جاری ہیں۔انہوں نے مزید کہا کہ ایران کی جانب سے دوبارہ مذاکرات یا کسی نئے جوہری معاہدے کا کوئی ارادہ نظر نہیں آ رہا۔امریکی مسلح افواج کے سربراہان کی مشترکہ کمیٹی کے چیئرمین جنرل ڈین کین نے بریفنگ میں کہا کہ ایران کے جنوبی ساحلی علاقوں میں فضائی کنٹرول حاصل کر لیا گیا ہے اور کارروائیاں اب اندرونی علاقوں کی طرف بڑھ رہی ہیں۔ان کے مطابق ایران کی جانب سے میزائل اور ڈرون حملوں میں کمی آئی ہے جبکہ امریکی افواج کے پاس اس جنگ کے لیے اسلحے کا وافر ذخیرہ موجود ہے۔جنرل ڈین کین نے کہا کہ نقصانات کا مکمل اندازہ لگانے میں وقت درکار ہوگا۔ان کے مطابق یہ ایک پیچیدہ اور خطرناک آپریشن ہے جو جلد ختم ہونے کا امکان نہیں رکھتا۔انہوں نے خبردار کیا کہ اگر ترکیہ پر میزائل حملہ ہوتا ہے تو نیٹو کے اجتماعی دفاع سے متعلق شق کے اطلاق کے بارے میں فی الحال کچھ کہنا قبل از وقت ہو گا۔امریکی عسکری قیادت کا کہنا ہے کہ اتحادی ممالک اپنا بھرپور دفاع کر رہے ہیں اور ایران کے کمان اور رابطہ نظام کو شدید دھچکا پہنچا ہے تاہم خطے میں بڑھتی ہوئی کشیدگی کے پیش نظر عالمی برادری کی تشویش میں اضافہ ہو رہا ہے اور جنگ کے پھیلاو کے خدشات برقرار ہیں۔