تاہم اب فخر زمان کے آؤٹ ہوکر ڈریسنگ روم جانے کی ایک ویڈیو سامنے آئی ہےجس میں انہیں بوجھل قدموں اور اداس انداز میں پویلین کی جانب بڑھتے دیکھا جاسکتا ہے۔
پاکستان کرکٹ ٹیم کے اوپنر فخر زمان آئی سی سی چیمپئنز ٹرافی کے پہلے میچ میں آوٹ ہونے کے بعد ڈریسنگ روم میں جا کر رو پڑے۔
فخر زمان انجری کے باعث جاری آئی سی سی چیمپئنز ٹرافی 2025 سے باہر ہوگئے ہیں اور اُن کی جگہ امام الحق کو ٹیم میں شامل کیا گیا ہے۔
19 فروری کو کراچی میں نیوزی لینڈ کے خلاف پہلے اوور میں فیلڈنگ کرتے ہوئے اوپننگ بلے باز زخمی ہو گئے تھے۔ یہ واقعہ میچ کے پہلے اوور میں اس وقت پیش آیا جب فخر زمان فیلڈنگ کے دوران عجیب و غریب انداز میں گر کر زخمی ہوئے۔ ان کی چوٹ کے بعد، پاکستان کرکٹ بورڈ (پی سی بی) نے کہا کہ بلے باز کے پٹھوں میں موچ کا معائنہ کیا جا رہا ہے۔
فخر زمان، مکمل طور پر فٹ نظر نہیں آرہے، چوتھے نمبر پر بیٹنگ کے لیے آئے، لیکن 41 گیندوں پر محض 24 رنز بنا کر مائیکل بریسویل کے ہاتھوں آوٹ ہوئے۔
پاکستان کرکٹ بورڈ کی جانب سے اپنے آفیشل سوشل میڈیا اکاؤنٹ پر شیئر کی گئی ایک ویڈیو میں فخر زمان کو ڈریسنگ روم میں لنگڑاتے ہوئے دیکھا جا سکتا ہے جہاں وہ رو پڑے۔ ان کے ساتھی کھلاڑی شاہین شاہ آفریدی بھی ویڈیو میں نظر آرہے ہیں، جو روتے ہوئے بلے باز کو تسلی دینے کی کوشش کر رہے ہیں۔
بعد میں فخر زمان نے انسٹاگرام پر اپنی پوسٹ میں لکھا کہ مجھے فخر کے ساتھ پاکستان کی نمائندگی کرنے کا اعزاز حاصل ہوا ہے۔ بدقسمتی سے میں اب آئی سی سی چیمپئنز ٹرافی 2025 سے باہر ہوں لیکن یقیناً اللہ بہترین منصوبہ ساز ہے۔ میں اس موقع کے لیے مشکور ہوں۔ میں گھر سے اپنی ٹیم کی حمایت کروں گا۔