امریکی اخبار "واشنگٹن پوسٹ” نے تصدیق کی ہے کہ پاکستان میں ہونے والے دہشت گرد حملوں میں افغان فورسز کو دیا گیا امریکی اسلحہ استعمال ہوا، جس سے پاکستان کے دعوے کی توثیق ہوگئی۔
اخبار کے مطابق 63 ہتھیار جن میں ایم-16 رائفلز، نائٹ وژن ڈیوائسز اور دیگر جدید اسلحہ شامل ہے، وہی ہیں جو امریکی حکومت نے افغان فورسز کو دیے تھے۔
M4A1 رائفل، جو 2018 میں امریکا میں تیار ہوئی، گزشتہ ماہ بلوچستان ٹرین حملے کے بعد حملہ آوروں کے قبضے سے برآمد ہوئی۔
یہ اسلحہ 2021 میں امریکی انخلا کے بعد افغانستان سے پاکستان منتقل ہوا اور کالعدم تنظیموں کے ہاتھوں میں پہنچ گیا۔
رپورٹ میں یہ بھی بتایا گیا کہ کالعدم تحریک طالبان پاکستان اور دیگر گروہ امریکی ساختہ اسلحے کو حملوں میں استعمال کر رہے ہیں۔
پاکستانی حکام نے گزشتہ سال امریکی صحافیوں کو دہشت گردوں سے قبضے میں لیے گئے اصل امریکی اسلحے کا مشاہدہ بھی کروایا تھا۔