امریکی صدر ڈونلڈ ٹرمپ نے یمن پر حملے کے جنگی منصوبہ لیک ہونے کی خبروں کو بے بنیاد اور میڈیا ٹرائل قرار دے دیا ہے۔
صدر ٹرمپ نے کہا کہ یہ خبریں جھوٹ پر مبنی ہیں اور صرف میڈیا کی طرف سے چلایا جانے والا ٹرائل ہے۔ انہوں نے مزید کہا کہ انہوں نے حوثیوں کے ٹھکانوں پر کامیاب حملے کیے، جبکہ صدر بائیڈن نے اس نوعیت کے حملے نہیں کیے کیونکہ وہ اپنے دور میں غفلت کا شکار رہے۔
ایک سوال کے جواب میں ٹرمپ نے کہا کہ یمن حملے سے متعلق چیٹ لیک ہونے کی ذمہ داری مشیر قومی سلامتی نے قبول کی ہے، تاہم انہوں نے یہ بھی کہا کہ یہ ممکن ہے کہ سگنل ایپ میں کسی قسم کی خرابی ہوئی ہو۔
صدر ٹرمپ نے میڈیا سے گفتگو کرتے ہوئے سوشل میڈیا ایپ سگنل کو اس معاملے کا ذمہ دار قرار دیا اور کہا کہ یہ ایپ رابطے کا مؤثر ذریعہ نہیں ہے۔ انہوں نے واضح کیا کہ حوثیوں کے خلاف حملے جاری رکھیں گے۔
دوسری جانب، ڈیموکریٹ رہنما ڈاکٹر آصف قدیر نے کہا کہ سوشل ایپ پر ایسی معلومات کا لیک ہونا نیشنل سیکیورٹی کے لیے سنگین مسئلہ ہے، اور اس کی تحقیقات ضروری ہیں۔
یاد رہے کہ اٹلانٹک میگزین کے ایڈیٹر ان چیف جیفری گولڈبرگ نے دعویٰ کیا تھا کہ انہیں یمن پر حملے سے دو گھنٹے پہلے ہی اس کے بارے میں اطلاع ملی تھی، کیونکہ وزیر دفاع پیٹ ہیگسیتھ نے منصوبہ غلطی سے ایک مسیجنگ گروپ میں بھیجا تھا۔