واشنگٹن(ایگزو نیوز ڈیسک) امریکہ نے ایران کے میزائل اور ڈرون پروگرام سے منسلک 32 افراد اور متعدد اداروں پر پابندیاں عائد کر دی ہیں۔ غیر ملکی خبر رساں ایجنسی کے مطابق پابندیوں کا دائرہ کار عالمی سطح پر ہے، جس میں متحدہ عرب امارات، ایران، چین، بھارت، جرمنی، ترکی، ہانگ کانگ اور یوکرین شامل ہیں۔
ایگزو نیوز کے مطابق امریکی محکمہ خارجہ کا کہنا ہے کہ یہ افراد اور ادارے ایرانی میزائل اور ڈرون پروگرام میں سرگرم ہیں اور خریداری نیٹ ورکس کے ذریعے مشرق وسطیٰ اور بحیرہ روم میں امریکی اور اتحادیوں کی کمرشل سرگرمیوں کے لیے خطرہ ہیں۔محکمہ خارجہ نے واضح کیا کہ پابندیوں کا مقصد ایران کے جارحانہ میزائل پروگرام کو محدود کرنا اور پاسداران انقلاب کو ایسے وسائل تک رسائی سے روکنا ہے جو خطے میں عدم استحکام پیدا کر سکتے ہیں۔امریکی حکام کا کہنا ہے کہ پابندیاں صدر ڈونلڈ ٹرمپ کی پالیسیوں کے تسلسل میں ایک قدم ہیں، جس کا مقصد ایران کے عالمی اثرات کو روکنا اور اس کے میزائل پروگرام کی بین الاقوامی خریداری نیٹ ورک کو نقصان پہنچانا ہے۔یہ اقدامات عالمی سیکیورٹی اور خطے میں استحکام کے تحفظ کے لیے ضروری قرار دیے جا رہے ہیں۔
تجزیہ نگاروں کا کہنا ہے کہ امریکہ کی یہ پابندی ایران کے ڈرون اور میزائل پروگرام پر عالمی دباو کو مزید بڑھا سکتی ہے اور ممکنہ طور پر ایران کی بین الاقوامی تجارت اور دفاعی نیٹ ورک کو سخت نقصان پہنچا سکتی ہے۔علاوہ ازیں،یہ اقدام خطے میں اتحادی ممالک کے ساتھ مشترکہ سیکیورٹی حکمت عملی کو بھی مستحکم کرے گا۔امریکی محکمہ خارجہ نے اعلان کیا کہ پابندیوں کے نفاذ کے ساتھ ایران کے میزائل اور ڈرون پروگرام کے خلاف اقدامات جاری رہیں گے اور امریکہ اپنے اتحادی ممالک کے ساتھ مل کر عالمی سطح پر ایران کے اس پروگرام کے اثرات کو روکنے کی پوری کوشش کرے گا۔