امریکا کے سابق صدر ڈونلڈ ٹرمپ نے میٹا کے سی ای او مارک زکربرگ کو عمر قید کی دھمکی دے دی۔
ریپبلکن امیدوار ڈونلڈ ٹرمپ نے اپنی نئی کتاب ‘سیو امریکہ’ میں لکھا ہے کہ اگر زکربرگ کی کمپنی نومبر کے انتخابات میں "دھوکہ دہی” کرتی ہے تو اسے جیل کی کارروائی کا سامنا کرنا پڑے گا۔ انہوں نے لکھا ہم اسے قریب سے دیکھ رہے ہیں، اور اگر اس نے اس بار کوئی غیر قانونی کام کیا تو وہ اپنی باقی زندگی جیل میں گزاریں گے۔
سابق صدر ٹرمپ نے بارہا دعویٰ کیا ہے کہ میٹا کے سی ای او نے 2020 کے امریکی صدارتی انتخابات میں مداخلت کی اور اس وقت کے ڈیموکریٹک امیدوار اور صدر جو بائیڈن کی حمایت کی جنہوں نے بالآخر انتخابات میں کامیابی حاصل کی۔ لیکن ٹرمپ نے ثبوت کے ساتھ اپنے دعوؤں کی کبھی حمایت نہیں کی۔
واضح رہے کہ ٹرمپ کی کتاب 3 ستمبر کو فروخت کیلئے پیش کی جائے گی۔ ٹرمپ کی کتاب وننگ ٹیم پبلشنگ کے ذریعے شائع کی جا رہی ہے اور پبلشر نے بتایا ہے کہ بغیر دستخط شدہ ورژن کیلئے اس کی قیمت 99 ڈالر ہوگی لیکن اگر خریدار دستخط شدہ کتاب چاہتا ہے تو اسے اس کیلئے اضافی 400 ڈالر ادا کرنے ہوں گے۔