پاکستان اور نیوزی لینڈ کے درمیان پانچ میچوں پر مشتمل ٹی 20 سیریز 16 مارچ سے شروع ہوگی، جس کی ٹرافی کی رونمائی کرائسٹ چرچ کے خوبصورت پورٹ ہلز پر کی گئی۔
اس موقع پر پاکستان کے محمد حارث اور نیوزی لینڈ کے کپتان ایش سودھی نے ٹرافی کی رونمائی کی اور تصاویر بنوائیں۔
پاکستانی کرکٹ ٹیم گزشتہ روز کرائسٹ چرچ پہنچی تھی، جہاں ایک دن کے آرام کے بعد آج اپنے پہلے ٹریننگ سیشن میں حصہ لیا۔ قومی اسکواڈ نے ہیگلے اوول میں پریکٹس کی، جس میں بیٹرز اور بولرز نے نیٹس سیشن سے پہلے ایکسرسائز ڈرلز میں بھی حصہ لیا۔
سلیکشن کمیٹی نے محمد رضوان سے ٹی 20 کی کپتانی واپس لے کر انہیں اسکواڈ سے ڈراپ کر دیا ہے۔ اس کے علاوہ بابر اعظم اور نسیم شاہ بھی ٹی 20 اسکواڈ کا حصہ نہیں ہیں۔ پاکستان کرکٹ بورڈ نے سلمان علی آغا کو ٹی 20 ٹیم کا کپتان مقرر کیا ہے، جبکہ شاداب خان کی طویل عرصہ بعد ٹیم میں واپسی ہوئی ہے اور انہیں نائب کپتان بنایا گیا ہے۔
ٹی 20 سیریز کے بعد تین ایک روزہ میچوں کی سیریز کھیلی جائے گی، جس کی قیادت محمد رضوان کریں گے۔ بابر اعظم اور نسیم شاہ ون ڈے اسکواڈ کا حصہ ہوں گے، تاہم شاہین شاہ آفریدی کو ون ڈے اسکواڈ سے ڈراپ کر دیا گیا ہے۔