سہہ فریقی سیریز: نیوزی لینڈ نے پاکستان کو شکست دیدی

لاہور: نیوزی لینڈ نے سہہ فریقی سیریز کے پہلے میچ میں پاکستان کو 78 رنز سے شکست دے دی۔
331 رنز کے ہدف کے تعاقب میں قومی ٹیم 252 رنز پر ہی ڈھیر ہوگئی۔ پاکستان کی جانب سے فخر زمان کے علاوہ کوئی کھلاڑی جم کر نہ کھیل سکا۔ فخر زمان نے 84 رنز کی شاندار اننگز کھیلی۔ انہوں نے 7 چوکوں اور 4 چھکوں کی مدد سے 84 رنز بنائے۔
اسٹار بلے باز بابر اعظم صرف دس رنز بنا کر ہی آوٹ ہوگئے۔ کپتان محمد رضوان بھی تین رنز پر چلتے بنے۔
اس سے قبل مہمان ٹیم نے پہلے بیٹنگ کرتے ہوئے 50 اوورز میں 6 وکٹوں پر 330 رنز بنائے تھے۔ نیوزی لینڈ کی طرف سے کین ولیمسن 58 ، ڈیرل مچل 81 بنا کر آوٹ ہوئے جبکہ گلین فلپس 106 رنز بنا کر ناقابل شکست رہے۔