ہالی ووڈ کے معروف ایکشن اسٹار ٹام کروز کو ان کی ہمت اور بہادری کے اعتراف میں امریکی نیوی کا سب سے بڑا شہری اعزاز دیا گیا ہے۔
عالمی میڈیا کے مطابق 62 سالہ اداکار ٹام کروز کو یہ اعزاز امریکی نیوی کے سیکرٹری کارلوس ڈیل ٹورو نے دیا۔ یہ تقریب لانگ کراس اسٹوڈیوز، چیرٹسی، سرے میں منعقد کی گئی، جہاں مِشن امپوسیبل کے اسٹار نے میڈل کے ساتھ تصاویر بھی بنوائیں۔
اس اہم موقع پر کروز نے نیوی کوٹ سوٹ، سفید قمیض، ہلکے نیلے رنگ کی ٹائی اور ڈریس شو پہن رکھے تھے۔ تصاویر میں ٹام کروز کو امریکی نیوی کے سیکرٹری کے ساتھ ہاتھ ملاتے ہوئے دیکھا جا سکتا ہے، جو گرے سوٹ اور ٹائی میں ملبوس تھے۔
یاد رہے کہ امریکی نیوی یہ اعزاز ان شہریوں کو دیتی ہے جنہوں نے طویل عرصے تک نیوی کی خدمت میں نمایاں کام کیا ہو۔ اس سے قبل اکیڈمی ایوارڈ یافتہ اسٹیون اسپیلبرگ اور ٹام ہینکس کو بھی یہ اعزاز فلم "سیونگ پرائیویٹ راین” پر ان کے کام کی وجہ سے دیا گیا تھا۔