پنجاب کے دارالحکومت لاہور میں چینی شہری کے گھر ہونے والی بڑی چوری کا ڈراپ سین ہو گیا۔ ڈیفنس بی کے علاقے میں مقیم چینی باشندے شی ڈیپو کے گھر سے 1 کروڑ 80 لاکھ روپے کی چوری میں گھر کے ملازمین ہی ملوث نکلے۔
اے ایس پی ڈیفنس شہر بانو نقوی نے پریس کانفرنس کرتے ہوئے بتایا کہ ایس ایچ او ڈیفنس بی علی حسن کی سربراہی میں پولیس نے بروقت کارروائی کرتے ہوئے ملزمان کو بے نقاب کیا۔ انہوں نے بتایا کہ ملزمان پولیس کو زیادہ دیر دھوکہ نہ دے سکے اور صرف 36 گھنٹوں میں بہاولپور سے گرفتار کر لیے گئے۔
گرفتار ہونے والوں میں مرکزی ملزم علی عزیز کے ساتھ شبیر اور امتیاز شامل ہیں۔ پولیس نے سی سی ٹی وی فوٹیج اور جدید ٹیکنالوجی کی مدد سے ملزمان کا سراغ لگایا۔ دورانِ تفتیش ملزمان نے جرم کا اعتراف بھی کر لیا ہے۔ ان کے قبضے سے 1 کروڑ 20 لاکھ روپے نقدی برآمد کر لی گئی ہے۔
ملزمان کے خلاف مقدمہ درج کر کے مزید تفتیش جاری ہے۔ ڈی آئی جی آپریشنز لاہور نے ایس پی کینٹ کو ملزمان کی گرفتاری کے لیے خصوصی ٹاسک دیا تھا، جس پر اے ایس پی شہر بانو نقوی کی سربراہی میں ایک خصوصی ٹیم تشکیل دی گئی۔ کامیاب کارروائی پر ایس پی کینٹ نے اے ایس پی شہر بانو، ایس ایچ او علی حسن اور پولیس ٹیم کو شاباش دی۔