کرک کے امیری کلے چوک پر 22 پہیوں والا ٹرک مسافر گاڑی سے ٹکرانے سے 12 افراد جاں بحق اور 15 زخمی ہوگئے۔
کرک کے ڈپٹی کمشنر کا کہنا تھا کہ حادثہ ٹرک کی بریک فیل ہونے کے بعد پیش آیا جس کی وجہ سے یہ مسافر گاڑی سے ٹکرا گیا۔ انہوں نے کہا کہ سڑک حادثے میں جانیں گنوانے والوں میں خواتین اور بچے بھی شامل ہیں۔
ریسکیو 1122 امدادی کارروائیاں کر رہی ہے اور صورتحال کو سنبھالنے کیلئے ہسپتالوں کو ہائی الرٹ کر دیا گیا ہے۔
دریں اثنا، لاہور میں ہفتہ کی علی الصبح ایک سڑک حادثے میں ایک شخص جاں بحق اور تین زخمی ہو گئے، جس میں چار گاڑیاں شامل تھیں۔
حادثہ مولانا شوکت علی روڈ پر جناح ہسپتال کے قریب پیش آیا جہاں تیز رفتار لینڈ کروزر نے دو کاروں اور موٹر سائیکل کو ٹکر مار دی جس کے نتیجے میں ایک شخص موقع پر ہی جاں بحق اور تین زخمی ہوگئے۔
پولیس اور امدادی ٹیموں نے موقع پر پہنچ کر جاں بحق اور زخمیوں کو ہسپتال منتقل کیا۔ پولیس نے لینڈ کروزر کے ڈرائیور کو جائے وقوعہ سے گرفتار کر لیا ہے جو شراب کے نشے میں دھت بتایا گیا ہے۔ مزید تفتیش جاری ہے۔