دہشتگردی کا پائیدار حل مذاکرات میں،وفاقی حکومت نے بات تسلیم کر لی،علی امین گنڈاپور کا دعویٰ

پشاور(ایگزو نیوز ڈیسک)وزیراعلیٰ خیبرپختونخوا علی امین گنڈاپور نے کہا ہے کہ دہشتگردی کے مسئلے کا پائیدار حل صرف مذاکرات کے ذریعے ہی ممکن ہے اور اس مقصد کے لیے افغانستان کے ساتھ بامقصد بات چیت ناگزیر ہے، وفاقی حکومت نے میری اس تجویز سے اتفاق کر لیا ہے اور افغان مہاجرین کی وطن واپسی باعزت اور مرحلہ وار طریقے سے ہونی چاہیے تاکہ انسانی ہمدردی اور خطے کے امن دونوں کو یقینی بنایا جا سکے۔
ایگزو نیوز کے مطابق وزیراعلیٰ خیبرپختونخوا علی امین گنڈاپور نے کہا ہے کہ دہشت گردی کا پائیدار حل صرف مذاکرات اور افغان مہاجرین کی باعزت،مرحلہ وار واپسی کے ذریعے ممکن ہے۔ انہوں نے خوش آئند قرار دیا کہ وفاقی حکومت نے بھی اس تجویز سے اتفاق کر لیا ہے، جو صوبے میں امن و امان کے قیام اور انسانی ہمدردی کے فروغ کے لیے نہایت اہم ہے۔وزیراعلیٰ نے واضح کیا کہ افغانستان میں جاری عدم استحکام کے اثرات خیبرپختونخوا پر براہِ راست پڑتے ہیں، اور یہی وجہ ہے کہ صوبے کو امن و امان کے سنگین مسائل کا سامنا ہے۔ انہوں نے دہشتگردی کے خلاف جنگ میں مسلح افواج، پولیس اور عوام کی قربانیوں کو بھی یاد کیا اور کہا کہ یہ قربانیاں ہمیشہ یاد رکھی جائیں گی۔دوسری جانب وزیراعلیٰ ہاوس میں نیشنل ڈیفنس یونیورسٹی کے نیشنل سیکیورٹی اینڈ وار کورس کے شرکا نے علی امین گنڈاپور سے ملاقات کی، جس میں ملکی سلامتی، خطے کی صورتحال اور صوبے کو درپیش چیلنجز پر تفصیلی تبادلہ خیال ہوا۔ ملاقات میں شرکا نے صوبے میں امن و امان کے قیام اور قومی سلامتی کے اقدامات پر غور کیا۔وزیراعلیٰ علی امین گنڈاپور کے مطابق صوبے میں امن و امان قائم رکھنے کے لیے موثر حکمت عملی، بین الاقوامی تعاون اور عوامی شراکت داری نہایت اہم ہے اور یہ سلسلہ جاری رہے گا تاکہ خطے میں دیرپا امن اور استحکام قائم کیا جا سکے۔