سپریم کورٹ آف پاکستان نے عدالتی کارکردگی میں اہم پیش رفت کرتے ہوئے گزشتہ دو ماہ کے دوران نمٹائے گئے مقدمات کی تفصیلات جاری کر دی ہیں۔
چیف جسٹس یحییٰ آفریدی کی سربراہی میں عدالت عظمیٰ نے فیصلہ سازی کے عمل کو تیز کرتے ہوئے 28 اکتوبر 2024 سے 3 جنوری 2025 تک 7,482 مقدمات کو نمٹا دیا۔
عدالت عظمیٰ کی جانب سے جاری کردہ تفصیلات کے مطابق کیس کی بہتر منصوبہ بندی، وسائل کی تقسیم اور انتظامی بہتری کے ذریعے عدالتی کارکردگی میں بہتری آئی۔ متعارف کرائی گئی اصلاحات میں ای-حلف نامے اور فوری تصدیق شدہ کاپیوں کی فراہمی شامل ہے۔
قانونی ماہرین، اسٹیک ہولڈرز اور سول سوسائٹی سے ان پٹ حاصل کرکے عوامی شمولیت کی حوصلہ افزائی کی گئی۔ بیان میں کہا گیا کہ چیف جسٹس کے دور دراز اضلاع کے دوروں اور ضلعی عدلیہ کی کارکردگی کو بہتر بنانے پر بھی توجہ دی گئی۔
بیان میں مزید کہا گیا کہ انصاف کی فراہمی کو یقینی بنانے کیلئے ضلعی عدلیہ کیلئے وسائل بڑھانے کیلئے اقدامات کیے گئے۔ سپریم کورٹ میں درج نئے مقدمات کی تعداد 2950 رہی۔ عدالتی نظام کو مزید شفاف اور موثر بنانے کیلئے جدید آئی ٹی سسٹمز کو مربوط کیا گیا۔
سپریم کورٹ نے کہا کہ عوامی ضروریات کے مطابق عدالتی نظام کو زیادہ ذمہ دار اور قابل رسائی بنانے کی کوششیں کی جا رہی ہیں۔