نیویارک(ایگزو نیوز ڈیسک)آبنائے ہرمز میں بڑھتی ہوئی کشیدگی نے عالمی توانائی منڈیوں کو ہلا کر رکھ دیا ہے،جہاں خام تیل کی قیمتیں 113 ڈالر فی بیرل سے تجاوز کر کے نئی بلند سطح پر پہنچ گئی ہیں جبکہ عالمی سٹاک مارکیٹس شدید دباو کا شکار ہیں۔ماہرین کے مطابق سپلائی میں ممکنہ رکاوٹوں اور جغرافیائی سیاسی تناو نے سرمایہ کاروں میں بے چینی پیدا کر دی ہے،جس کے اثرات عالمی معیشت پر گہرے اور دور رس ہو سکتے ہیں۔
ایگزو نیوز کے مطابق امریکا اور ایران کے درمیان جاری مذاکراتی تعطل نے عالمی توانائی منڈیوں کو ایک بار پھر شدید دباو میں ڈال دیا ہے،جہاں خام تیل کی قیمتیں تیزی سے بڑھتے ہوئے نئی بلند سطحوں کو چھو رہی ہیں۔برینٹ کروڈ 113 ڈالر فی بیرل سے تجاوز کر چکا ہے جبکہ امریکی خام تیل (WTI) بھی 112 ڈالر کے قریب ٹریڈ ہو رہا ہے،جو عالمی معیشت کے لیے خطرے کی گھنٹی سمجھے جا رہے ہیں۔مشرق وسطیٰ میں کشیدگی اور بالخصوص آبنائے ہرمز کی صورتحال نے توانائی کی عالمی ترسیل کو غیر یقینی بنا دیا ہے جبکہ ایران اور امریکا کے درمیان سفارتی کوششیں ایک بار پھر تعطل کا شکار دکھائی دیتی ہیں۔اس پیش رفت نے نہ صرف عالمی منڈیوں بلکہ امریکی داخلی معیشت کو بھی متاثر کرنا شروع کر دیا ہے،جہاں پیٹرول کی قیمتوں میں مزید اضافے کے خدشات بڑھ رہے ہیں۔
ڈونلڈ ٹرمپ نے ایران کی تازہ ترین پیشکش مسترد کرتے ہوئے واضح کیا ہے کہ واشنگٹن تہران کی شرائط پر کسی قسم کا سمجھوتہ کرنے کے لیے تیار نہیں۔ ایرانی تجویز میں ایٹمی پروگرام پر مذاکرات کو موخر کرنے کے بدلے آبنائے ہرمز کو مشروط طور پر کھولنے کی بات شامل تھی، جسے امریکی قیادت نے ناقابل قبول قرار دیا۔وائٹ ہاوس کے مطابق صدر ٹرمپ نے اپنی قومی سلامتی ٹیم کے ساتھ اہم مشاورت کے بعد ایران کو اپنی شرائط اور ممکنہ ڈیڈ لائنز سے آگاہ کر دیا ہے جبکہ سوشل میڈیا پر جاری اپنے بیان میں انہوں نے دعویٰ کیا کہ ایران شدید دباو کا شکار ہے اور فوری طور پر آبنائے ہرمز کی بحالی چاہتا ہے۔دوسری جانب امریکی حکام کو داخلی سطح پر بڑھتی ہوئی مہنگائی اور توانائی بحران کے خدشات کا سامنا ہے۔ رپورٹس کے مطابق اگر آبنائے ہرمز میں رکاوٹ برقرار رہی تو امریکا میں پیٹرول کی قیمتیں مزید بڑھ سکتی ہیں، جس سے عوامی دباو میں اضافہ ہوگا۔
ادھر عالمی سٹاک مارکیٹس میں غیر یقینی صورتحال برقرار ہے،جہاں ایشیائی اور یورپی مارکیٹس میں ملا جلا رجحان دیکھنے میں آیا جبکہ پاکستان سٹاک ایکسچینج میں بھی نمایاں مندی ریکارڈ کی گئی اور 100 انڈیکس 1 ہزار سے زائد پوائنٹس کمی کے ساتھ 1 لاکھ 67 ہزار کی سطح پر آ گیا۔واضح رہے کہ ایران اور امریکا کے درمیان جاری کشیدگی اور توانائی سپلائی میں ممکنہ رکاوٹیں عالمی معیشت کے لیے سنگین خطرات پیدا کر سکتی ہیں اور اگر سفارتی پیش رفت نہ ہوئی تو آنے والے دنوں میں تیل کی قیمتوں میں مزید اضافہ متوقع ہے۔