پنجاب میں سموگ کی سطح پھر بڑھ گئی، لاہور آلودہ ترین شہر میں دوسرے نمبر پر آگیا۔
تفصیلات کے مطابق لاہور ایئر کوالٹی انڈیکس پر 523 ریڈنگ کے ساتھ دنیا کا دوسرا آلودہ شہر بن گیا ہے۔ جبکہ بھارتی دارالحکومت نئی دہلی 786 اے کیو آئی کے ساتھ دنیا کا آلودہ ترین شہر ہے۔
نومبر میں لاہور اور پنجاب کے دیگر شہروں میں سموگ کے بحران نے صحت کے سنگین مسائل پیدا کیے جن میں آنکھوں میں جلن، سانس لینے میں دشواری اور عام زندگی کو متاثر کرنے والے دیگر صحت کے مسائل شامل ہیں۔ صوبے کے بیشتر اضلاع میں حد نگاہ انتہائی محدود رہی جب کہ حد نگاہ کی وجہ سے موٹر ویز کے کئی حصے بند کر دیے گئے تھے۔
لاہور مسلسل دنیا بھر کے آلودہ ترین شہروں میں سرفہرست ہے، جس سے حکام کی جانب سے فوری کارروائی بھی کی گئی ہے۔ لاہور میں فضائی آلودگی عالمی ادارہ صحت (ڈبلیو ایچ او) کی جانب سے قابل قبول سمجھی جانے والی سطح سے کئی گنا بڑھ گئی۔