سکیورٹی فورسز نے بلوچستان کے ضلع قلعہ عبداللہ کے علاقے گلستان میں چوکی پر خوارج کے حملے کی کوشش کو ناکام بناتے ہوئے 5 دہشت گردوں کو ہلاک کر دیا۔
آئی ایس پی آر کے مطابق پوسٹ میں داخل ہونے کی کوشش کو سکیورٹی فورسز نے مؤثر طریقے سے ناکام بنایا۔ جس کے بعد خوارج نے بارود سے بھری گاڑی چوکی کی دیوار سے ٹکرائی۔ سکیورٹی فورسز نے بہادری سے حملے کا مقابلہ کیا۔ فائرنگ کے تبادلے میں دو خودکش بمباروں سمیت پانچوں خوارج کو جہنم واصل کر دیا گیا۔
شدید فائرنگ کے تبادلے کے دوران پاک فوج کے دو بہادر جوان بھی شہید ہوئے۔ شہدا میں نائیک طاہر خان (عمر 39 سال، رہائشی ضلع ٹانک) اور لانس نائیک طاہر اقبال (عمر 26 سال؛ ضلع کرک) شامل ہیں۔
آئی ایس پی آر کے مطابق علاقے میں سینی ٹائزیشن آپریشن کیا جا رہا ہے۔ اس گھناؤنے فعل کے مرتکب افراد کو انصاف کے کٹہرے میں لایا جائے گا۔ پاکستان کی سکیورٹی فورسز دہشت گردی کی لعنت کو ختم کرنے کے لیے پرعزم ہیں۔ ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔