خیبرپختونخوا (کے پی) اور بلوچستان میں کیے گئے وسیع انٹیلی جنس بیسڈ آپریشنز کے دوران 9 دسمبر سے اب تک سیکیورٹی فورسز کے ہاتھوں 43 دہشت گرد ہلاک ہوچکے ہیں، جس سے فتنہ الخوارج اور بلوچستان میں سرگرم دیگر دہشت گرد گروپوں کو بڑا دھچکا لگا ہے۔ اے آر وائی نیوز نے آئی ایس پی آر کے حوالے سے اطلاع دی۔
12 سے 13 دسمبر کی رات، سکیورٹی فورسز نے ضلع لکی مروت میں ایک انٹیلی جنس پر مبنی کارروائی کی جس کے نتیجے میں چھ خوارج مارے گئے۔ جمعہ کو آئی ایس پی آر کی ایک نیوز ریلیز میں کہا گیا کہ 9 دسمبر سے اب تک صوبہ کے پی میں اٹھارہ خوارج کو جہنم واصل کر دیا گیا ہے۔
سکیورٹی فورسز نے جمعہ کو شدید فائرنگ کے تبادلے کے بعد بلوچستان کے اضلاع موسیٰ خیل اور پنجگور میں دو الگ الگ کارروائیوں میں 10 دہشت گردوں کو ہلاک کیا۔ 9 دسمبر سے اب تک بلوچستان میں 25 دہشت گردوں کو جہنم واصل کیا جا چکا ہے۔
آئی ایس پی آر کا کہنا ہے کہ یہ کارروائیاں اس وقت تک جاری رہیں گی جب تک علاقے میں امن بحال نہیں ہو جاتا اور خوارج کا خاتمہ نہیں ہو جاتا، کیونکہ پاکستان کی سکیورٹی فورسز ملک سے دہشت گردی کی لعنت کا صفایا کرنے کے لیے پرعزم ہیں۔