سموگ میں کمی آنے کے بعد پنجاب کے کچھ حصوں میں کل اسکولز دوبارہ کھولنے کا فیصلہ کیا گیا ہے۔ پنجاب حکومت نے اس سے قبل 17 سے 25 نومبر تک سکول بند رکھنے کا اعلان کیا تھا۔
پنجاب حکومت کی جانب سے جاری نوٹیفکیشن کے مطابق راولپنڈی ڈویژن کے سکول کل دوبارہ کھل جائیں گے کیونکہ سموگ کی صورتحال میں بہتری کے بعد علاقے میں فضائی آلودگی میں کمی آئی ہے۔ راولپنڈی، جہلم، اٹک اور چکوال کے سکول کل سے کھلیں گے۔
لاہور اور پنجاب کے دیگر شہروں میں زہریلی سموگ کی سطح میں مبینہ طور پر کچھ کمی آئی ہے۔ لیکن اس کے باوجود لاہور 497 ایئر کوالٹی انڈیکس (اے کیو آئی) کے ساتھ دنیا کا دوسرا آلودہ ترین شہر ہے۔
اس سے قبل لاہور کی ضلعی انتظامیہ نے سموگ کے بڑھتے ہوئے خطرے سے نمٹنے کیلئے بیرونی سرگرمیوں پر پابندی عائد کر دی تھی۔
ڈی سی لاہور کی جانب سے جاری کردہ نوٹیفکیشن کے مطابق تمام کھیلوں، نمائشوں اور تقریبات کو معطل کر دیا گیا ہے۔
مزید برآں، دکانیں، بازار اور مالز رات 8 بجے تک بند ہو جائیں گے، جب کہ میڈیکل سٹورز، لیبز، پیٹرول پمپس اور کریانہ کی دکانیں پابندیوں سے مستثنیٰ ہیں۔ بڑے ڈپارٹمنٹ اسٹورز کو صرف گروسری اور میڈیکل سیکشن کھلے رکھنے کی اجازت ہے۔