سعودی عرب کے حرمین میں دینی امور کے سربراہ شیخ عبدالرحمان السدیس نے اعلان کیا ہے کہ حج سیزن کے دوران ضیوف الرحمان کی حفاظت کے لیے خطبہ جمعہ اور نماز کا دورانیہ مختصر کیا جائے گا۔
سعودی خبر رساں ادارے کے مطابق، شدید گرمی کے باعث عازمین حج کی سہولت کے پیش نظر یہ فیصلہ کیا گیا ہے۔ شیخ السدیس نے ہدایت کی ہے کہ مسجد الحرام اور مسجد نبوی صلی اللہ علیہ وآلہ وسلم میں جمعہ کا خطبہ اور نماز کا دورانیہ 15 منٹ تک کم کر دیا جائے گا۔ اس کے علاوہ، تمام نمازوں کے اوقات میں بھی کمی کرتے ہوئے اذان اور اقامت کے درمیان کا وقت 5 سے 10 منٹ کر دیا گیا ہے۔
اس وقت لاکھوں عازمین حج مکہ مکرمہ اور مدینہ منورہ پہنچ چکے ہیں، اور موسم گرما کی شدت کی وجہ سے معمر اور بیمار عازمین کو مشکلات کا سامنا کرنا پڑتا ہے، جس کے باعث یہ اقدام اٹھایا گیا ہے۔
دوسری جانب، سعودی عرب میں ذی الحج کا چاند نظر آ گیا ہے۔ حج کا رکن اعظم وقوف عرفہ جمعرات 5 جون کو ادا کیا جائے گا، جبکہ عیدالاضحیٰ جمعہ 6 جون کو منائی جائے گی۔ سعودی رویت ہلال کمیٹی نے چاند نظر آنے کا باضابطہ اعلان کیا ہے.