آسٹریلیا کے خلاف جاری ٹیسٹ سیریز میں مایوس کن کارکردگی کے پیش نظر بھارتی کپتان روہت شرما نے ٹیسٹ کرکٹ کو خیر آباد کرنے کا فیصلہ کر لیا۔
بھارتی میڈیا کے مطابق روہت شرما آسٹریلیا کے خلاف سیریز کا آخری ٹیسٹ میچ کھیل کر ریٹائرمنٹ کا اعلان کریں گے۔ انہوں نے اس حوالے سے بھارتی کرکٹ بورڈ، کوچز اور سینئر کھلاڑیوں سے بات کر کے اپنے فیصلے سے آگاہ کیا ہے۔
رپورٹ کے مطابق کچھ دوستوں نے روہت شرما کو اپنے فیصلے پر نظر ثانی کرنے کا کہا ہے لیکن انہوں نے فیصلہ تبدیل کرنے سے انکار کر دیا ہے۔
واضح رہے کہ بھارتی ٹیسٹ کرکٹ ٹیم کے کپتان نے آسٹریلیا کے خلاف تین ٹیسٹ میچوں کی 6 اننگز میں صرف 31 رنز بنائے ہیں۔ جس پر اُن کو شدید تنقید کا نشانہ بنایا جا رہا ہے۔
آسٹریلیا کو ٹیسٹ سیریز میں دو ایک کی برتری حاصل ہے جب کہ ایک میچ بغیر کسی نتیجے کے ختم ہو گیا تھا۔ آخری میچ میں کس ٹیم کو کامیابی ملتی ہے اس حوالے سے کچھ کہنا قبل از وقت ہوگا۔