بھارتی میڈیا نے دعویٰ کیا ہے کہ بھارتی کرکٹ ٹیم کے کپتان روہت شرما آئی سی سی مین چیمپئنز ٹرافی کے آغاز سے قبل پاکستان کا دورہ کریں گے تاکہ وہ میزبان ملک میں منعقدہ پیشگی ایونٹس میں شرکت کر سکیں۔
یہ پیشرفت دونوں ممالک کے کرکٹ شائقین کے جوش و خروش میں اضافہ کا سبب بنی ہے کیونکہ کئی برسوں بعد ایک بھارتی کرکٹر کو پاکستان میں کسی بین الاقوامی ایونٹ کیلئے آتے ہوئے دیکھا جائے گا۔
بھارتی میڈیا کے مطابق، روہت شرما چیمپئنز ٹرافی کے ایونٹس میں حصہ لیں گے جن میں تمام کپتانوں کی فوٹوشوٹ اور پریس کانفرنس شامل ہیں، جو آئی سی سی کی تشہیری مہم کا حصہ ہوں گی۔
تاہم، بھارتی کرکٹ بورڈ کی جانب سے روہت شرما کے پاکستان دورے کے حوالے سے ابھی تک کوئی سرکاری اعلان نہیں کیا گیا، جبکہ پڑوسی ملک کی ٹیم ابھی تک آئندہ ٹورنامنٹ کیلئے اپنی اسکواڈ کا اعلان نہیں کر پائی۔
واضح رہے کہ چیمپئنز ٹرافی آٹھ ٹیموں پر مشتمل ٹورنامنٹ ہے، جو 15 میچز پر محیط ہوگا اور یہ 19 فروری سے 9 مارچ تک پاکستان اور دبئی میں تین مختلف مقامات پر کھیلا جائے گا۔
ٹیموں کو دو گروپوں میں تقسیم کیا گیا ہے۔ گروپ اے میں پاکستان، بھارت، نیوزی لینڈ اور بنگلا دیش شامل ہیں، جبکہ گروپ بی میں افغانستان، جنوبی افریقہ، انگلینڈ اور آسٹریلیا شامل ہیں۔
میزبان پاکستان 19 فروری کو کراچی میں نیوزی لینڈ کے خلاف اپنے میچ سے ٹورنامنٹ کا آغاز کرے گا۔