راولپنڈی میں بڑی پیش رفت،بند ٹرانسپورٹ اڈے اور میٹرو سروس جزوی بحال

راولپنڈی(ایگزو نیوز ڈیسک)راولپنڈی میں شہریوں کے لیے اہم پیش رفت سامنے آئی ہے،جہاں پیرودھائی سمیت شہر کے تمام بند ٹرانسپورٹ اڈوں کو دوبارہ کھولنے کا فیصلہ کیا گیا ہے۔حکام کے مطابق ایک ہفتے کی بندش کے بعد پبلک ٹرانسپورٹ کی بحالی کا عمل شروع کر دیا گیا ہے جبکہ راولپنڈی اسلام آباد میٹرو بس سروس بھی جزوی طور پر بحال کر دی گئی ہے،جس سے شہریوں کو سفری سہولت میں نمایاں ریلیف ملنے کی توقع ہے۔
ایگزو نیوز کے مطابق راولپنڈی میں شہریوں کے لیے بڑی ریلیف کی خبر سامنے آئی ہے، جہاں پیرودھائی سمیت تمام اہم ٹرانسپورٹ اڈوں کو پیر کی صبح 6 بجے سے دوبارہ کھولنے کا اعلان کر دیا گیا ہے۔ حکام کے مطابق گزشتہ ایک ہفتے سے بند پبلک ٹرانسپورٹ سسٹم کو بھی بحال کرنے کی اجازت دے دی گئی ہے،جس کے بعد شہر میں سفری سرگرمیاں دوبارہ معمول پر آنے لگیں گی۔انتظامیہ کے مطابق ٹرانسپورٹ کی بحالی کا مقصد شہریوں کو درپیش سفری مشکلات میں کمی لانا اور روزمرہ معمولات زندگی کو بتدریج بحال کرنا ہے۔حکام کا کہنا ہے کہ شہر میں ٹرانسپورٹ سروسز کی بحالی سے معیشت اور کاروباری سرگرمیوں پر بھی مثبت اثرات مرتب ہوں گے۔دوسری جانب راولپنڈی اسلام آباد میٹرو بس سروس بھی جزوی طور پر دوبارہ شروع کر دی گئی ہے۔متعلقہ حکام کے مطابق میٹرو بس سروس اب صدر سٹیشن سے شہید ملت سٹیشن تک 22 سٹیشنز پر دستیاب ہوگی،جس سے ہزاروں مسافروں کو روزانہ سہولت میسر آئے گی تاہم انتظامیہ نے واضح کیا ہے کہ پریس گراونڈ اور پاک سیکرٹریٹ سٹیشنز پر میٹرو بس سروس فی الحال معطل رہے گی اور صورتحال کا جائزہ لے کر آئندہ مرحلے میں مکمل بحالی کا فیصلہ کیا جائے گا۔شہری حلقوں نے ٹرانسپورٹ کی بحالی کے فیصلے کا خیرمقدم کرتے ہوئے امید ظاہر کی ہے کہ جلد مکمل نظام معمول پر آ جائے گا جبکہ ٹرانسپورٹ حکام کا کہنا ہے کہ صورتحال کو مسلسل مانیٹر کیا جا رہا ہے تاکہ سروسز کو محفوظ اور موثر انداز میں چلایا جا سکے۔