لاہور(ایگزو نیوز ڈیسک)پنجاب میں بلدیاتی انتخابات کے انعقاد کی تیاریاں تیز ہو گئی ہیں، جہاں صوبائی حکومت نے 12.52 ارب روپے کے فنڈز کی منظوری دے کر انتخابی عمل کو عملی شکل دینے کا عندیہ دے دیا ہے،وہیں کچہ کے علاقوں میں سیکیورٹی آپریشنز، پولیس کی استعداد بڑھانے اور کسانوں کی معاونت کے لیے بھی اہم فیصلے کیے گئے ہیں،جس سے صوبے میں بیک وقت سیاسی،سیکیورٹی اور زرعی شعبوں میں پیش رفت کی نئی راہیں ہموار ہونے کی توقع ہے۔
ایگزو نیوز کے مطابق پنجاب حکومت نے بلدیاتی انتخابات کے انعقاد کیلئے 12 ارب 52 کروڑ 24 لاکھ روپے کے فنڈز کی منظوری دے دی ہے،یہ فیصلہ وزیراعلیٰ پنجاب مریم نواز کی زیر صدارت صوبائی کابینہ کے 36ویں اجلاس میں کیا گیا جہاں مختلف اہم انتظامی، سکیورٹی اور ترقیاتی امور پر تفصیلی غور کیا گیا۔کابینہ اجلاس میں محکمہ بلدیات کی جانب سے پیش کی گئی سمری کی منظوری دیتے ہوئے بلدیاتی انتخابات کے انعقاد کیلئے درکار مکمل فنڈز فراہم کرنے کا فیصلہ کیا گیا جبکہ روجھان کے نوجوانوں کیلئے پولیس بھرتیوں میں خصوصی رعایتی پیکج کی بھی منظوری دی گئی تاکہ پسماندہ علاقوں کے نوجوانوں کو روزگار کے بہتر مواقع میسر آ سکیں۔
اجلاس میں کچہ کے علاقوں میں امن و امان کی صورتحال بہتر بنانے کیلئے بھی اہم اقدامات کی منظوری دی گئی،جن کے تحت پولیس کیلئے اسلحہ اور حفاظتی آلات کی خریداری کیلئے ایک ارب 10 کروڑ روپے مختص کیے گئے جبکہ کچہ میں تعینات اہلکاروں کیلئے ہارڈ ایریا الاونس کی منظوری بھی دی گئی تاکہ مشکل حالات میں فرائض انجام دینے والے اہلکاروں کی حوصلہ افزائی کی جا سکے۔مزید برآں کچہ کے پولیس شہدا کے پیکج سے متعلق قواعد میں نرمی کی بھی منظوری دی گئی۔اجلاس میں زرعی شعبے سے متعلق بریفنگ دیتے ہوئے بتایا گیا کہ ”اپنا کھیت، اپنا روزگار“ پروگرام کے تحت ایک لاکھ 71 ہزار درخواستیں موصول ہوئیں،جن میں سے 60 ہزار درخواست گزاروں کو اہل قرار دیا گیا ہے،وزیراعلیٰ نے گندم کی بروقت کاشت کو یقینی بنانے اور کسانوں کو ہر ممکن سہولت فراہم کرنے کی ہدایت جاری کی۔تعلیمی شعبے پر گفتگو کے دوران وزیراعلیٰ نے میٹرک امتحانات میں طالبات کی 78 فیصد کامیابی پر اطمینان کا اظہار کیا اور متعلقہ حکام کو تعلیمی معیار مزید بہتر بنانے کی ہدایت دی جبکہ صوبے بھر کی سرکاری دکانوں سے متعلق بھی تفصیلی رپورٹ طلب کی گئی۔
ٹرانسپورٹ کے شعبے میں ایک بڑے اقدام کا اعلان کرتے ہوئے وزیراعلیٰ مریم نواز نے کہا کہ رواں سال دسمبر تک پنجاب بھر میں 1100 الیکٹرو بسیں فراہم کر دی جائیں گی،جس کا مقصد شہریوں کو جدید،ماحول دوست اور معیاری سفری سہولیات فراہم کرنا ہے۔اجلاس میں امن و امان کی مجموعی صورتحال کا بھی جائزہ لیا گیا اور پولیس فورس کو جدید سہولیات سے آراستہ کرنے کے عزم کا اعادہ کیا گیا جبکہ وزیراعلیٰ نے سیاسی امور پر گفتگو کرتے ہوئے آزاد کشمیر کے انتخابات میں مسلم لیگ ن کی کامیابی کو عوام کے اعتماد کا مظہر قرار دیا اور کہا کہ خطے کے عوام بھی ترقیاتی منصوبوں کے خواہاں ہیں۔