پنجاب حکومت کا شہریوں کے لیے بڑا ریلیف،گاڑی مالکان کے لیے خوشخبری،بروقت ادائیگی پر ٹوکن ٹیکس میں 10 فیصد رعایت کا اعلان

لاہور(ایگزو نیوز ڈیسک)محکمہ ایکسائز پنجاب نے موٹر وہیکل ٹوکن ٹیکس کی بروقت ادائیگی کو فروغ دینے کے لیے اہم ریلیف کا اعلان کرتے ہوئے کہا ہے کہ 31 اگست 2026 تک ٹیکس جمع کرانے والے شہریوں کو 10 فیصد رعایت فراہم کی جائے گی۔اس اقدام کا مقصد عوام کو مقررہ مدت کے اندر ادائیگی کی ترغیب دینا اور ٹیکس نظام میں بہتری لانا ہے۔
محکمہ کے مطابق وہ شہری جو مقررہ تاریخ سے پہلے اپنا ٹوکن ٹیکس ادا کریں گے، نہ صرف 10 فیصد رعایت سے مستفید ہوں گے بلکہ تاخیر کی صورت میں عائد ہونے والے جرمانوں سے بھی محفوظ رہیں گے۔حکام کا کہنا ہے کہ اس پالیسی سے نہ صرف شہریوں کو مالی سہولت میسر آئے گی بلکہ ٹیکس وصولی کے نظام میں شفافیت اور کارکردگی بھی بہتر ہوگی۔محکمہ ایکسائز نے شہریوں کو ہدایت کی ہے کہ وہ ای پے پنجاب پلیٹ فارم کے ذریعے گھر بیٹھے محفوظ، آسان اور تیز رفتار طریقے سے اپنی ادائیگی مکمل کریں۔حکام کے مطابق یہ ڈیجیٹل نظام حکومت پنجاب کی جانب سے ای گورننس کے فروغ کی ایک اہم پیش رفت ہے،جس کے ذریعے عوام کو سرکاری واجبات کی ادائیگی کے لیے جدید سہولیات فراہم کی جا رہی ہیں۔مزید بتایا گیا ہے کہ ای پے پنجاب کے استعمال سے شہری دفاتر کے غیر ضروری چکر لگانے سے بچ سکتے ہیں اور چند آسان مراحل میں اپنی ادائیگی مکمل کر سکتے ہیں، جس سے وقت اور وسائل دونوں کی بچت ممکن ہے۔محکمہ ایکسائز نے گاڑی مالکان پر زور دیا ہے کہ وہ مقررہ ڈیڈ لائن یعنی 31 اگست 2026 سے قبل اپنا ٹوکن ٹیکس ادا کر کے 10 فیصد رعایت سے فائدہ اٹھائیں اور کسی بھی ممکنہ جرمانے یا قانونی پیچیدگی سے بچیں، کیونکہ یہ سہولت صرف محدود مدت کے لیے دستیاب ہے۔