جذبات پر قابو پائیں،دشمن کے منصوبے ناکام بنائیں،تحمل اور قومی اتحاد وقت کی ضرورت،عظمیٰ بخاری کا ایرانی سپریم لیڈر کی شہادت پر پیغام

لاہور(ایگزو نیوز ڈیسک)وزیر اطلاعات پنجاب عظمیٰ بخاری نے ایرانی سپریم لیڈر آیت اللہ علی خامنہ ای کی شہادت پر افسوس کا اظہار کرتے ہوئے عوام اور مذہبی جماعتوں سے پرامن رہنے اور تحمل کا مظاہرہ کرنے کی اپیل کی ہے۔ انہوں نے کہا کہ ایران پر حالیہ حملے اور سپریم لیڈر کی شہادت انتہائی افسوسناک ہیں اور پاکستان ہر ممکن سفارتی اور اخلاقی طریقے سے ایران کی حمایت کرتا رہا ہے۔ اقوام متحدہ میں بھی پاکستان نے واضح طور پر ایران کے خلاف حملے کی مذمت کی ہے۔
ایگزو نیوز کے مطابق وزیر اطلاعات پنجاب عظمیٰ بخاری نے شہریوں اور مذہبی جماعتوں سے کہا کہ اگر احتجاج کو شدت میں بدل دیا گیا یا قانون ہاتھ میں لیا گیا تو یہ دشمن کے منصوبوں کو فائدہ پہنچا سکتا ہے۔ انہوں نے زور دیا کہ ہر پاکستانی کی ذمہ داری ہے کہ وہ اپنے جذبات کو قابو میں رکھے، احتجاج کو پرامن رکھے اور ملک کے اندر کسی بھی قسم کی بدامنی یا نقصان سے بچائے۔وزیر اطلاعات نے واضح کیا کہ قومی اتحاد اور استحکام ہی اس وقت پاکستان کی اصل طاقت ہے، اور عوام کو چاہیے کہ وہ اپنی ذمہ داری کا ادراک کرتے ہوئے تحمل اور قانون کی پاسداری کریں۔ ان کا کہنا تھا کہ پرامن رویہ ہی ملک کی داخلی سلامتی اور عوام کے تحفظ کے لیے سب سے اہم ہے۔یاد رہے کہ عظمیٰ بخاری کا یہ بیان ایسے وقت میں سامنے آیا ہے جب خطے میں کشیدگی اور داخلی ردعمل کے امکانات بڑھ چکے ہیں، اور حکومت اپنی قیادت اور عوام کو جذباتی اور پرامن رویہ اپنانے کی اہمیت سے آگاہ کر رہی ہے۔