پاکستان تحریک انصاف (پی ٹی آئی) کی سیاسی کمیٹی نے گزشتہ رات اسلام آباد ہائی کورٹ کے فیصلے کے پیش نظر 24 نومبر کے احتجاجی مارچ کو منسوخ کرنے اور بشریٰ بی بی کی جانب سے پیدا ہونے والے تنازعہ پر غور کیا۔
کمیٹی کے ارکان کی اکثریت اسلام آباد ہائی کورٹ کے فیصلے کی روشنی میں 24 نومبر کے احتجاجی مارچ کو منسوخ کرنے کے حق میں تھی۔ ان کا موقف تھا کہ حکومت کے ساتھ بات چیت کا موقع دیا جانا چاہیے۔
سیاسی کمیٹی کی سفارش کے بعد پی ٹی آئی رہنماؤں کا وفد عمران سے ملاقات کے لیے اڈیالہ جیل گیا تاہم وہ اپنے قائد سے ملاقات نہ کرسکے۔ بعد ازاں کے پی کے وزیر اعلیٰ علی امین گنڈا پور نے احتجاجی مارچ کے معاملے پر بات چیت کے لیے پشاور میں پارٹی رہنماؤں کا اجلاس طلب کیا۔
پی ٹی آئی رہنما اور کے پی کے وزیراعلیٰ کے مشیر بیرسٹر سیف نے رابطہ کرنے پر کہا کہ اگرچہ وہ سیاسی کمیٹی کے رکن نہیں ہیں، تاہم اسلام آباد ہائی کورٹ کے فیصلے کو چیلنج کرنے کے لیے پارٹی کے اندر بات چیت جاری ہے۔