اسلام آباد(ایگزو نیوز ڈیسک)سابق وزیر اعظم عمران خان کی بینائی سے متعلق سامنے آنے والے انکشافات نے ایک نیا تنازع کھڑا کر دیا ہے،جہاں پاکستان تحریک انصاف(پی ٹی آئی)نے علاج میں مبینہ غفلت اور شفافیت کے فقدان پر شدید تحفظات کا اظہار کیا ہے۔پارٹی نے موقف اختیار کیا ہے کہ عمران خان کو ان کے ذاتی معالجین تک رسائی نہیں دی جا رہی،جس کے خلاف احتجاج اور قانونی اقدامات کا عندیہ بھی دیا گیا ہے جبکہ اس معاملے نے انسانی حقوق اور قیدیوں کو فراہم کی جانے والی طبی سہولیات پر اہم سوالات کھڑے کر دیے ہیں۔
ایگزو نیوز کے مطابق پاکستان تحریک انصاف نے بانی چیئرمین عمران خان کی آنکھ کے علاج سے متعلق سنگین تحفظات کا اظہار کرتے ہوئے دعویٰ کیا ہے کہ ان کی بینائی شدید متاثر ہوئی اور علاج کے باوجود مکمل بحال نہیں ہو سکی،جیل میں مناسب طبی سہولیات فراہم نہ کیے جانے اور علاج میں تاخیر نے صورتحال کو مزید پیچیدہ بنا دیا ہے۔سپریم کورٹ کے باہر میڈیا سے گفتگو کرتے ہوئے وکیل بیرسٹر سلمان صفدر نے کہا کہ عمران خان نے خود انہیں بتایا کہ وہ کئی ماہ تک آنکھ کے مسئلے سے متعلق جیل حکام کو آگاہ کرتے رہے لیکن اس پر توجہ نہیں دی گئی،جس کے نتیجے میں ایک آنکھ کی بینائی مکمل طور پر متاثر ہو گئی،بعد ازاں طبی مداخلت کے بعد صرف محدود حد تک بہتری آئی تاہم اس کے بعد مزید پیش رفت نہیں ہو سکی۔
پی ٹی آئی کے مطابق عمران خان اپنے علاج سے مطمئن نہیں ہیں اور وہ مسلسل اپنے ذاتی معالجین تک رسائی کا مطالبہ کر رہے ہیں تاکہ بیماری کی اصل وجہ کا تعین کیا جا سکے تاہم انہیں اس بنیادی حق سے محروم رکھا جا رہا ہے۔ پارٹی ترجمان نے مطالبہ کیا ہے کہ معروف معالجین کو فوری رسائی دی جائے اور بہتر علاج کے لیے انہیں ہسپتال منتقل کیا جائے۔پارٹی نے یہ بھی الزام عائد کیا ہے کہ عمران خان اور ان کی اہلیہ کو قید تنہائی میں رکھا گیا ہے، جبکہ دیگر قیدی رہنماوں کی صحت کے حوالے سے بھی خدشات ظاہر کیے گئے ہیں۔ ترجمان کے مطابق بروقت اور معیاری طبی سہولیات ہر قیدی کا بنیادی حق ہیں اور اس ضمن میں کسی بھی قسم کی کوتاہی قابل قبول نہیں۔واضح رہے کہ اس معاملے نے ایک بار پھر قیدیوں کو فراہم کی جانے والی طبی سہولیات، انسانی حقوق اور جیل انتظامیہ کے کردار پر اہم سوالات اٹھا دیے ہیں جبکہ آئندہ دنوں میں اس معاملے کے قانونی اور سیاسی اثرات مزید نمایاں ہونے کا امکان ہے۔