فوجی عدالتوں نے 9 مئی کے تشدد سے متعلق کیسز میں پاکستان تحریک انصاف (پی ٹی آئی) کے بانی عمران خان کے بھتیجے حسان نیازی سمیت مزید 60 ملزمان کو سزا سنا دی ہے۔
انٹر سروسز پبلک ریلیشنز (آئی ایس پی آر) نے بتایا کہ سپریم کورٹ کے فیصلے کی روشنی میں 9 مئی کی سزاؤں کے اعلان کے سلسلے میں، فیلڈ جنرل کورٹ مارشل نے تمام شواہد کی جانچ پڑتال کے بعد، تمام قانونی حقوق کی فراہمی کو یقینی بناتے ہوئے، درج ذیل باقی 60 مجرموں کو سزائیں سنائی ہیں۔
حفیظ اللہ نیازی کے بیٹے حسان نیازی کو جناح ہاؤس حملے میں 10 سال قید بامشقت کی سزا سنائی گئی ہے۔
آئی ایس پی آر نے کہا کہ 9 مئی کو فوجی تحویل میں ملزمان کا ٹرائل متعلقہ قوانین کے تحت مکمل کیا گیا ہے اور تمام مجرموں کے پاس اپیل کا حق اور دیگر قانونی ذرائع برقرار ہیں، جیسا کہ آئین اور قانون کی ضمانت دی گئی ہے۔
آئی ایس پی آر کے بیان میں کہا گیا ہے کہ قوم، حکومت اور مسلح افواج انصاف کی بالادستی اور ریاست کی ناقابل تسخیر رٹ کو برقرار رکھنے کے اپنے عزم پر ثابت قدم ہیں۔