سینیٹ ضمنی الیکشن سے قبل تحریک انصاف متحرک،9 رکنی پارلیمانی بورڈ قائم،اہم نام سامنے آگئے

پشاور(ایگزو نیوز ڈیسک)پاکستان تحریک انصاف(پی ٹی آئی) نے سینیٹ کے ضمنی انتخاب کے لیے اپنی سیاسی حکمت عملی کو حتمی شکل دیتے ہوئے 9 رکنی پارلیمانی بورڈ تشکیل دے دیا ہے،جو امیدوار کے انتخاب اور ٹکٹ کی منظوری کا ذمہ دار ہوگا۔واضح رہے کہ یہ سیٹ مراد سعید کی نااہلی کے بعد خالی ہوئی تھی۔
پارٹی اعلامیے کے مطابق خیبرپختونخوا کے وزیراعلیٰ محمد سہیل آفریدی کو پارلیمانی بورڈ کا چیئرمین مقرر کیا گیا ہے،جو اس اہم عمل کی سربراہی کریں گے۔بورڈ میں صوبائی اسمبلی کے سپیکر بابر سلیم سواتی،سینئر رہنما اکبر ایوب خان،پارٹی چیئرمین بیرسٹر گوہر علی خان اور جنرل سیکرٹری علی اصغر خان شامل ہیں،جو پارٹی کے اہم فیصلوں میں کلیدی کردار ادا کریں گے۔اعلامیے کے مطابق دیگر اراکین میں محمد عاطف خان،شاہد خان خٹک،صبغت اللہ خان اور علی خان جدون بھی شامل ہیں،جس سے ظاہر ہوتا ہے کہ پارٹی نے مختلف دھڑوں اور تجربہ کار قیادت کو اس عمل میں شامل کیا ہے۔ذرائع کے مطابق سینیٹ کے ٹکٹ کے حصول کے لیے پارٹی کے اندر سرگرمیاں تیز ہو چکی ہیں اور سابق صوبائی وزیر شوکت علی یوسفزئی بھی ٹکٹ کے امیدواروں میں شامل ہیں۔سیاسی مبصرین کے مطابق پارلیمانی بورڈ کی تشکیل کے بعد تحریک انصاف کے اندر ٹکٹ کی دوڑ میں تیزی آنے کا امکان ہے جبکہ آئندہ دنوں میں امیدوار کے نام کے اعلان کے ساتھ سیاسی منظرنامہ مزید واضح ہو جائے گا۔