ملک میں سیاسی استحکام کے باعث پاکستان اسٹاک ایکسچینج میں کارروباری ہفتے کا آغاز مثبت رہا، کے ایس سی 100 انڈیکس میں 3,000 پوائنٹس سے زیادہ کا اضافہ دیکھا گیا۔
تفصیلات کے مطابق 100 انڈیکس 3417.39 پوائنٹس یا 3.12 فیصد چھلانگ لگا کر 112,930.53 پوائنٹس پر پہنچ گیا، جو پچھلے سیشن کے 109,513.14 پوائنٹس کے بند ہونے سے زیادہ ہے۔ گزشتہ ہفتے تقریباً 9,000 پوائنٹس کی کمی دیکھی گئی، لیکن جمعہ کو مارکیٹ میں بحالی ہوئی تھی۔
معاشی ماہرین کا کہنا ہے کہ مارکیٹ میں تیزی حکومت اور پی ٹی آئی کے درمیان مذاکرات کے آغاز کے بعد دیکھی گئی۔ آج اسپیکر قومی اسمبلی سردار ایاز صادق کی زیر صدارت اجلاس ہوا جس میں حکومت اور پی ٹی آئی کے نمائندوں نے موجودہ سیاسی صورتحال پر تبادلہ خیال کیا۔
حکومتی کمیٹی میں نائب وزیراعظم اسحاق ڈار، رانا تنویر حسین، عرفان صدیقی، علیم خان، راجہ پرویز اشرف، نوید قمر، خالد مقبول صدیقی اور فاروق ستار شامل تھے۔
دوسری جانب اپوزیشن کمیٹی میں اسد قیصر، حامد رضا اور علامہ راجہ ناصر عباس شامل تھے۔ توقع ہے کہ سلمان اکرم راجہ جلد ہی مذاکرات میں شامل ہوں گے۔
وزیر اعلیٰ خیبرپختونخوا علی امین گنڈا پور کابینہ کے اجلاس میں مصروفیت کے باعث مذاکرات کے پہلے دور میں شرکت نہیں کر سکے۔
علاوہ ازیں اپوزیشن لیڈر عمر ایوب بھی عدالت میں پیشی کے باعث مذاکرات میں شریک نہ ہو سکے۔ اگلا اجلاس 2 جنوری کو ہوگا۔