نجی اکیڈمی کی چھت گر گئی،پنڈی بھٹیاں میں اندوہناک سانحہ،4 بچوں سمیت 6 افراد جاں بحق

حافظ آباد(ایگزو نیوز ڈیسک)پنڈی بھٹیاں کے علاقے سکھیکی منڈی میں ایک دل دہلا دینے والا حادثہ پیش آیا جہاں نجی اکیڈمی کی چھت اچانک گرنے سے چار معصوم بچوں سمیت چھ قیمتی جانیں ملبے تلے دب کر زندگی کی بازی ہار گئیں، جاں بحق افراد میں اکیڈمی کا مالک اور اس کی والدہ بھی شامل ہیں، جس سے سانحہ مزید المناک صورت اختیار کر گیا ہے۔
ایگزو نیوز کے مطابق افسوسناک حادثہ اچانک اس وقت پیش آیا جب بچے اپنی تعلیم میں مصروف تھے کہ کچی اور کمزور چھت بوجھ برداشت نہ کر سکی اور دھڑام سے زمین بوس ہو گئی۔ موقع پر ہی چیخ و پکار مچ گئی اور علاقہ مکین اپنی مدد آپ کے تحت ملبہ ہٹانے میں مصروف ہو گئے۔ اطلاع ملنے پر ریسکیو ٹیمیں فوری طور پر موقع پر پہنچیں اور امدادی کارروائیاں شروع کیں۔ دو زخمی بچوں کو بروقت نکال کر تحصیل ہیڈکوارٹر ہسپتال منتقل کیا گیا، جہاں ان کی حالت تشویشناک بتائی جا رہی ہے۔ریسکیو حکام کے مطابق ملبہ ہٹانے کا عمل تیزی سے جاری ہے جبکہ اس کی نگرانی اسسٹنٹ کمشنر پنڈی بھٹیاں بذاتِ خود کر رہے ہیں۔ جائے وقوعہ پر غم و اندوہ کا عالم ہے، لواحقین بین کرتے دکھائی دے رہے ہیں اور علاقہ ایک گہرے صدمے میں ڈوب گیا ہے۔سانحے کے بعد سوالات اٹھ رہے ہیں کہ آیا یہ عمارت حفاظتی معیار کے مطابق تعمیر کی گئی تھی یا نہیں۔ ماہرین کے مطابق اکثر دیہی اور نیم شہری علاقوں میں تعلیمی ادارے کمزور ڈھانچوں میں قائم کیے جاتے ہیں، جہاں طلبہ کی زندگیاں شدید خطرات سے دوچار رہتی ہیں۔یہ اندوہناک واقعہ نہ صرف متاثرہ خاندانوں کے لیے ناقابلِ تلافی صدمہ ہے بلکہ حکام کے لیے بھی ایک لمحہ فکریہ ہے کہ وہ حفاظتی اقدامات پر سختی سے عمل درآمد کرائیں تاکہ مستقبل میں ایسے سانحات سے بچا جا سکے۔ آج پنڈی بھٹیاں کے اس سانحے نے ایک بار پھر یہ حقیقت آشکار کر دی ہے کہ معصوم جانوں کی حفاظت کے لیے سنجیدہ اور عملی اقدامات کی اشد ضرورت ہے۔