خیبر پختونخوا کے مشیر اطلاعات بیرسٹر محمد علی سیف نے دعویٰ کیا کہ وزیراعظم شہباز شریف کو ہٹانے اور پاکستان پیپلز پارٹی (پی پی پی) کے چیئرمین بلاول بھٹو زرداری کو نیا وزیراعظم بنانے کیلئے ایوان صدر میں خفیہ ملاقاتیں کی جا رہی ہیں۔
ایک بیان میں، مشیر نے کہا کہ دونوں باپ بیٹے وزارت عظمیٰ کے لیے تمام ضروری کوششیں کر رہے ہیں، انہوں نے مزید کہا کہ صدر اپنے بیٹے کو وزیر اعظم کے طور پر دیکھنے کے لیے خفیہ مشن پر تھے۔
بیرسٹر سیف نے کہا کہ زرداری کو چاہیے کہ وہ پاکستان تحریک انصاف (پی ٹی آئی) کو عوام کی طرف سے دیا گیا مینڈیٹ چرانے کی بجائے منصفانہ طریقے سے اپنے بیٹے کو وزیر اعظم بنائیں۔ مزید کہا کہ شریف اور زرداری دونوں چوری شدہ مینڈیٹ کے ذریعے اقتدار کے مزے لوٹ رہے ہیں۔
انہوں نے اس بات کا اعادہ کیا کہ زرداری کو یہ بات ذہن میں رکھنی چاہیے کہ تحریک انصاف اپنے مینڈیٹ کی بحالی کے لیے جدوجہد جاری رکھے گی۔