اسلام آباد: وزیر اعظم شہباز شریف نے حالات کے باعث جلیبیاں بیچنے والے پاکستانی فٹبال اسٹار کو وزیر اعظم ہاوس طلب کر لیا۔
پاکستان کی قومی فٹ بال ٹیم کے اُبھرتے ہوئے کھلاڑی محمد ریاض کو وزیراعظم ہاؤس کی جانب سے دعوت موصول ہوئی ہے، یہ دعوت اس ویڈیو کے بعد آئی جس میں وہ جلبی بیچتے ہوئے نظر آئے۔
29 سالہ کھلاڑی، جو 2018 کے ایشین گیمز میں پاکستان کی نمائندگی کر چکے ہیں، کو اس کے سابقہ ادارے کے الیکٹرک کی فٹ بال ٹیم کے خاتمے کے بعد بے روزگاری کا سامنا کرنا پڑا۔
کے الیکٹرک کی فٹ بال ٹیم کی تحلیل اس وقت ہوئی جب سابقہ پاکستان تحریک انصاف (پی ٹی آئی) حکومت نے محکمہ جاتی کھیلوں پر متنازعہ پابندی عائد کر دی تھی، جو ریاض کے مطابق کھیلوں کی صنعت کے لئے نقصان دہ اور غیر ضروری تھی۔
اس کے نتیجے میں، ریاض، جو محکمہ جاتی فٹ بال میں نمایاں کھلاڑی تھے، نے اپنی زندگی گزارنے کے لیے ہنگو میں ایک سڑک کنارے جلیبیاں بیچنے کا فیصلہ کیا۔
وزیراعظم شہباز شریف کے محکمہ جاتی کھیلوں کی بحالی کے احکام کے باوجود، ان کھیلوں کا خاتمہ ہزاروں کھلاڑیوں کے لیے مشکلات کا باعث بن رہا ہے۔
ریاض نے اس ہفتے کے آغاز میں کہا، "میں نے کئی سالوں تک محکمہ جاتی کھیلوں کی بحالی کا انتظار کیا، اور وزیراعظم کے اعلان کے بعد امید پیدا ہوئی، مگر تاخیر ناقابل برداشت ہو گئی۔ آمدنی نہ ہونے کی وجہ سے، میں نے اپنی فیملی کی کفالت کے لیے جل بیچنے کا راستہ اپنایا۔”
پاکستان اسپورٹس بورڈ (پی ایس بی) کے ذرائع کے مطابق، ریاض کو آج وزیراعظم ہاؤس بلایا گیا ہے، جہاں وہ وزیراعظم شہباز شریف سے ملاقات کر سکتے ہیں، اگر ان کی مصروفیات اجازت دیں۔
ریاض کو وزیراعظم ہاؤس کی دعوت پاکستان کے باصلاحیت کھلاڑیوں کی مشکلات کو تسلیم کرنے اور ان کی عزت بحال کرنے کے لیے ایک اہم قدم سمجھا جا رہا ہے۔