وزیر اعظم شہباز شریف نے ملک میں فٹ بال کے کھیل کے فروغ کیلئے تمام ممکنہ اقدامات کی یقین دہانی کراتے ہوئے اعلان کیا کہ حکومت اس حوالے سے جلد ایک جامع منصوبہ پیش کرے گی۔
وزیر اعظم شہباز شریف نے پاکستان کی اسٹریٹ چائلڈ فٹ بال ٹیم سے ملاقات کی جس نے حال ہی میں ناروے میں ہونے والے ایک ٹورنامنٹ میں شاندار کارکردگی کا مظاہرہ کیا۔ وزیر اعظم آفس کی پریس ریلیز کے مطابق، وزیر اعظم نے متعلقہ حکام سے کہا کہ وہ محکمانہ کھیلوں کو مکمل طور پر بحال کریں اور رپورٹ پیش کریں۔
انہوں نے کہا کہ اسٹریٹ چائلڈ فٹبال ٹیم کی شاندار کارکردگی اس حقیقت کو ظاہر کرتی ہے کہ اگر پاکستانی نوجوانوں کو مواقع فراہم کیا جائے تو وہ عالمی سطح پر اپنی صلاحیتوں کا لوہا منوا سکتے ہیں۔
وفد میں کیپٹن محمد عدیل، ٹاپ سکورر محمد کاشف، ٹیم منیجر سید محمد اویس، مسلم ہینڈز کے ایگزیکٹو ڈائریکٹر سید جاوید گیلانی، ڈائریکٹر گلوبل آپریشنز ارسلان نصرت اور کمیونیکیشن ڈائریکٹر محمد ریحان طاہر شامل تھے۔
وزیراعظم شہباز شریف نے کھلاڑیوں کو پاکستان کے روشن ستارے قرار دیتے ہوئے کہا کہ پاکستان سٹریٹ چائلڈ فٹ بال ٹیم ملک کا نام روشن کر رہی ہے۔ انہوں نے پاکستان سٹریٹ چائلڈ فٹ بال کے فروغ میں مسلم ہینڈز کے کردار کو بھی سراہا۔
کھلاڑیوں نے ان کی میزبانی کرنے اور کھیل میں ان کی کامیابیوں کو تسلیم کرنے پر وزیر اعظم کا شکریہ ادا کیا۔
مسلم ہینڈز کے نمائندوں نے وزیراعظم کو پاکستان سمیت دنیا بھر میں اسٹریٹ فٹ بال کے فروغ کیلئے تنظیم کے کردار سے آگاہ کیا۔