جاتی امرا میں وزیرِ اعظم شہباز شریف کی نواز شریف سے اہم ملاقات،بڑے بھائی کو آزاد کشمیر اور بیرون ملک دوروں پر بریفنگ

لاہور(ایگزو نیوز ڈیسک)وزیر اعظم محمد شہباز شریف نے جاتی امرا میں مسلم لیگ ن کے صدر اور اپنے بڑے بھائی،سابق وزیر اعظم میاں محمد نواز شریف سے اہم ملاقات کی،اس موقع پر وزیرِ اعظم نے اپنے حالیہ بیرون ملک دوروں پر تفصیلی گفتگو کرتے ہوئے ”بڑے بھائی“کو مختلف اہم امور سے آگاہ کیا۔
ایگزو نیوز کے مطابق وزیرِ اعظم  شہباز شریف  نے آزاد کشمیر کی حالیہ صورتحال اور کامیاب مذاکرات پر نواز شریف کو مکمل بریفنگ دی اور خطے میں امن و استحکام کے لیے حکومتی اقدامات پر روشنی ڈالی۔ملاقات کے دوران ملکی سیاسی اور معاشی معاملات پر بھی مشاورت کی گئی۔واضح رہے کہ وزیرِ اعظم شہباز شریف کل ملائیشین وزیرِ اعظم انور ابراہیم کی خصوصی دعوت پر دو روزہ دورے پر ملائیشیا روانہ ہوں گے۔دورے کے دوران دونوں ممالک کے درمیان تجارتی،معاشی اور سفارتی تعلقات کے فروغ پر بات چیت متوقع ہے۔دوسری جانب ملائیشین وزیر اعظم  نے سابق وزیر اعظم نواز شریف کو بھی ملائیشیا کے دورے کی دعوت دی تھی تا ہم نواز شریف نے انوار ابراہیم کا شکریہ ادا کرتے ہوئے کہا کہ وہ کسی اور موزوں موقع پر یہ دورہ کریں گے۔