وزیر اعظم شہباز شریف کا سہیل آفریدی سے ٹیلی فونک رابطہ،دہشت گردوں کے خلاف صوبائی حکومت کو مکمل تعاون کی یقین دہانی

اسلام آباد(ایگزو نیوز ڈیسک)بنوں میں پیش آنے والے دہشت گرد حملے کے بعد وفاق اور صوبے کے درمیان اعلیٰ سطح پر رابطہ تیز ہو گیا ہے، جہاں وزیر اعظم شہباز شریف نے وزیر اعلیٰ خیبر پختونخوا سہیل آفریدی سے ٹیلی فونک گفتگو کرتے ہوئے دہشت گردوں کے خلاف مزید موثر اور فیصلہ کن حکمت عملی اپنانے کا واضح اشارہ دیا ہے۔ اس رابطے میں نہ صرف سکیورٹی صورتحال پر تبادلہ خیال کیا گیا بلکہ وفاق کی جانب سے صوبائی حکومت کو ہر ممکن تعاون فراہم کرنے کے عزم کا بھی اعادہ کیا گیا، جس سے دہشت گردی کے خلاف مشترکہ کارروائیوں میں تیزی آنے کا امکان ظاہر کیا جا رہا ہے۔
ایگزو نیوز کے مطابق وزیراعظم محمد شہباز شریف نے خیبر پختونخوا کے وزیر اعلیٰ محمد سہیل آفریدی سے ٹیلیفونک رابطہ کر کے بنوں میں پولیس چوکی پر ہونے والے دہشت گرد حملے کی شدید مذمت کی اور قیمتی انسانی جانوں کے ضیاع پر گہرے دکھ اور افسوس کا اظہار کیا۔انہوں نے شہید ہونے والے پولیس اہلکاروں کے درجات کی بلندی کے لیے دعا کی اور ان کے اہل خانہ سے دلی ہمدردی اور تعزیت کا اظہار کیا جبکہ زخمیوں کی جلد صحت یابی کے لیے نیک تمناوں کا اظہار بھی کیا۔وزیراعظم نے اس موقع پر واضح کیا کہ دہشت گردی کے خاتمے کے لیے وفاقی حکومت تمام صوبوں کے ساتھ مکمل ہم آہنگی کے ساتھ کام جاری رکھے گی اور خیبر پختونخوا حکومت کو ہر ممکن تعاون فراہم کیا جائے گا۔انہوں نے اس عزم کا اعادہ کیا کہ ملک سے دہشت گردی کے مکمل خاتمے کے لیے تمام وسائل بروئے کار لائے جائیں گے اور اس ناسور کو جڑ سے اکھاڑ پھینکنے کے لیے مربوط اور موثر حکمت عملی اپنائی جائے گی۔گفتگو کے دوران دونوں رہنماوں نے دہشت گردی کے خلاف برسرپیکار پاک افواج، سکیورٹی فورسز اور پولیس کے کردار کو سراہتے ہوئے ان کی قربانیوں کو خراج تحسین پیش کیا اور اس بات پر زور دیا کہ قومی سلامتی کے لیے تمام اداروں اور عوام کو متحد ہو کر اس چیلنج کا مقابلہ کرنا ہوگا۔