وزیراعظم شہباز شریف نے جمعیت علمائے اسلام (ف) کے سربراہ مولانا فضل الرحمان کو مدرسوں کے رجسٹریشن بل پر مذاکرات کیلئے آج ملاقات کی دعوت دی ہے۔
وزیر اعظم شہباز شریف اور مولانا فضل الرحمان کے درمیان ملاقات سہ پہر 3 بجے وزیر اعظم ہاؤس میں ہو گی۔
ذرائع کے مطابق وزیر اعظم شہباز شریف نے مولانا فضل الرحمان سے رابطہ کیا اور ان سے بل کے معاملے پر مذاکرات کرنے کو کہا۔ ذرائع کا کہنا ہے کہ جے یو آئی (ف) کے سربراہ وزیراعظم کو مدارس کی رجسٹریشن کے حوالے سے اتحاد تنظیمات مدارس کے موقف پر بریفنگ دیں گے۔
ذرائع نے مزید بتایا کہ اگر وزیراعظم نئی تجاویز لے کر آئیں گے تو فضل الرحمان مشاورت کیلئے دوبارہ اتحاد تنظیمات مدارس سے رجوع کریں گے۔
وزیراعظم کی جانب سے مذاکرات کی دعوت ملنے کے فوراً بعد مولانا فضل الرحمان نے مشاورت کیلئے مفتی تقی عثمانی سے رابطہ کیا تھا۔
یہاں یہ بات قابل ذکر ہے کہ اتحاد تنظیمات مدارس پاکستان نے منگل کو 2019 کے موقف سے انحراف کرتے ہوئے اعلان کیا تھا کہ مدارس کسی بھی سرکاری محکمے کا حصہ نہیں بنیں گے اور خود مختار رہیں گے۔