ایک خصوصی طیارہ شام میں پھنسے 318 پاکستانیوں کو لے کر پاکستان پہنچ گیا۔ طیارہ بیروت ایئرپورٹ سے روانہ ہوا تھا۔
پاکستان پہنچنے پر وزیر منصوبہ بندی، ترقی اور خصوصی اقدامات پروفیسر احسن اقبال نے وزارت خارجہ، وزارت سمندر پار پاکستانیز اور نیشنل ڈیزاسٹر مینجمنٹ اتھارٹی (این ڈی ایم اے) کے نمائندوں کے ہمراہ واپس آنے والے پاکستانی شہریوں کا استقبال کیا۔
ائیرپورٹ پر مسافروں سے بات کرتے ہوئے احسن نے کہا کہ لبنان نے انہیں وزیر اعظم شہباز کی درخواست پر ویزے جاری کیے تھے۔ انہوں نے پاکستانی شہریوں کے وطن واپسی میں سہولت فراہم کرنے پر لبنانی وزیراعظم کا شکریہ ادا کیا۔
وزیر منصوبہ بندی نے مسافروں کو مزید بتایا کہ این ڈی ایم اے نے انہیں ان کی متعلقہ منزلوں تک پہنچانے کے لیے بسوں کا انتظام کیا ہے۔
واضح رہے کہ شام میں بشار الاسد کی حکومت کے خاتمے کے بعد پیدا ہونے والے بحران کے بعد سیکڑوں پاکستانی زائرین اب بھی وہاں پھنسے ہوئے ہیں۔ جن کو واپس پاکستان لانے کیلئے حکومت اقدامات کر رہی ہے۔