اسلام آباد(ایگزو نیوز ڈیسک)حکومت نے پیٹرولیم مصنوعات کی قیمتوں میں ایک بار پھر اضافہ کر دیا ہے،جس کے بعد عوام کو مہنگائی کا ایک اور جھٹکا لگ گیا، پیٹرول کی قیمت میں 6 روپے 39 پیسے جبکہ ہائی سپیڈ ڈیزل کی قیمت میں 7 روپے 83 پیسے فی لٹر اضافہ کیا گیا ہے۔
پیٹرولیم ڈویژن کی جانب سے جاری نوٹیفکیشن کے مطابق پیٹرول کی نئی قیمت 327 روپے 12 پیسے فی لٹر مقرر کر دی گئی ہے جبکہ ہائی سپیڈ ڈیزل کی قیمت اضافے کے بعد 375 روپے 4 پیسے فی لٹر ہو گئی ہے۔نئی قیمتوں کا اطلاق رات 12 بجے سے ہوگیا ہے اور یہ 23 جولائی کے لیے نافذ العمل رہیں گی۔حکومت کی جانب سے پیٹرولیم مصنوعات کی قیمتوں میں یہ مسلسل تیسرا اضافہ ہے جبکہ نئے نظام کے تحت قیمتوں کا تعین روزانہ کی بنیاد پر کیا جا رہا ہے۔اوگرا کی سفارشات کی بنیاد پر جاری کیے گئے نوٹیفکیشن کے مطابق عالمی مارکیٹ میں قیمتوں میں اضافے کو مدنظر رکھتے ہوئے نئے نرخ مقرر کیے گئے ہیں۔اعداد و شمار کے مطابق گزشتہ چند روز کے دوران پیٹرول اور ڈیزل کی قیمتوں میں نمایاں اضافہ ہو چکا ہے۔صرف دو دن کے دوران پیٹرول کی قیمت میں مجموعی طور پر 11 روپے 32 پیسے فی لٹر اضافہ ہوا جبکہ تین دنوں میں ہائی سپیڈ ڈیزل کے نرخ 20 روپے 69 پیسے فی لٹر تک بڑھ گئے ہیں۔
حکومت کا موقف ہے کہ عالمی سطح پر جاری کشیدگی،خصوصاً امریکا اور ایران کے درمیان بڑھتی صورتحال کے باعث عالمی منڈی میں خام تیل کی قیمتوں میں اضافہ ہوا، جس کے اثرات پاکستان میں بھی پیٹرولیم مصنوعات کی قیمتوں پر پڑ رہے ہیں۔واضح رہے کہ حکومت نے حال ہی میں پیٹرولیم مصنوعات کی قیمتوں کے تعین کا اختیار اوگرا کو منتقل کرتے ہوئے روزانہ بنیادوں پر نرخ مقرر کرنے کا نظام متعارف کرایا تھا۔نئے طریقہ کار کے بعد مسلسل قیمتوں میں تبدیلی نے صارفین اور کاروباری حلقوں میں تشویش پیدا کر دی ہے۔