اسلام آباد ہائی کورٹ میں فلک جاوید کی بازیابی کی درخواست دائر ،والد نے فوری سماعت کی اپیل کر دی

اسلام آباد(ایگزو نیوز ڈیسک)پاکستان تحریک انصاف(پی ٹی آئی)کی کارکن اور معروف سوشل میڈیا ایکٹوسٹ فلک جاوید خان کی بازیابی کے لئے اسلام آباد ہائی کورٹ میں درخواست دائر کر دی گئی ۔
ایگزو نیوز کے مطابق اسلام آباد ہائیکورٹ میں سوشل میڈیا ایکٹوسٹ صنم جاوید کی بہن فلک جاوید کی بازیابی کے لیے درخواست دائر کر دی گئی ہے۔ یہ درخواست فلک جاوید کے والد جاوید اقبال کی جانب سے ایڈووکیٹ میاں علی اشفاق نے جمع کرائی۔درخواست میں موقف اپنایا گیا ہے کہ فلک جاوید کو عدالت کے روبرو پیش کرنے کا حکم دیا جائے اور ان کے خلاف درج مقدمات کی مکمل تفصیلات فراہم کی جائیں تاکہ قانونی تقاضے پورے کیے جا سکیں۔درخواست گزار نے عدالت سے استدعا کی ہے کہ معاملے کی سنگینی اور انسانی حقوق سے جڑے پہلووں کے باعث کیس کی سماعت آج ہی کی جائے تاکہ فلک جاوید کی بازیابی یقینی بنائی جا سکے۔واضح رہے کہ گذشتہ رات فلک جاوید کو کزانی ہائٹس اسلام آباد سے گرفتار کیا گیا تھا جہاں اس نے ایک رات سٹے کرنی تھی اور پھر پشاور جلسے کیلئے جانا تھا۔فلک جاوید کی گرفتاری کے لئے آنے والے نامعلوم افراد اسے سفید رنگ کی لینڈ کروزر میں اپنے ساتھ نامعلوم مقام پر لے گئے جبکہ اس موقع پر پولیس کی گاڑی اور ایک کالے رنگ کا ویگو ڈالا بھی ان کے ساتھ موجود تھا ۔