پاکستان کرکٹ بورڈ (پی سی بی) نے قومی ٹیم کی کوچنگ کے لیے ایک مرتبہ پھر اشتہار جاری کیا ہے۔
پی سی بی نے اپنی ویب سائٹ پر بیٹنگ، بالنگ، فیلڈنگ اور اسٹرینتھ کوچ کے عہدوں کے لیے درخواستیں طلب کی ہیں۔ دلچسپی رکھنے والے امیدوار 6 جون شام 5 بجے تک اپنی درخواستیں جمع کرا سکتے ہیں۔
بیٹنگ اور بولنگ کوچ کے لیے کم از کم لیول ٹو کوچنگ کورس کے ساتھ 5 سال کا تجربہ ضروری ہے۔ فیلڈنگ کوچ کے لیے بھی یہی شرط رکھی گئی ہے، جبکہ سٹرینتھ اینڈ کنڈیشننگ کوچ کے لیے اسپورٹس سائنسز یا فزیکل ایجوکیشن میں بیچلر ڈگری اور 10 سال کا تجربہ درکار ہے۔
حال ہی میں، پی سی بی نے سابق کیوی کرکٹر مائیک ہیسن کو قومی ٹیم کا ہیڈ کوچ مقرر کرنے کا اعلان کیا تھا۔ اب بورڈ بیٹنگ، بالنگ، فیلڈنگ اور سٹرینتھ کوچ کی تلاش میں ہے، اور امید کی جا رہی ہے کہ سابق کرکٹرز اس موقع پر اپنی درخواستیں جمع کروانے میں دلچسپی لیں گے۔
مائیک ہیسن کی تقرری کے بعد، پی سی بی نے کوچنگ اسٹاف میں تبدیلیوں کا بھی فیصلہ کیا ہے۔