دنیا بھر کی طرح پاکستان میں بھی مسیحی برادری سخت سکیورٹی میں مذہبی جوش و جذبے کے ساتھ کرسمس منا رہی ہے۔
لاہور میں تقریبات کا آغاز گرجا گھروں میں بڑے پیمانے پر ہوا جہاں لوگوں نے پاکستان کی خوشحالی اور امن کیلئے دعائیں کیں۔ پنجاب بھر میں 2,900 سے زائد گرجا گھروں کو چراغاں کیا گیا ہے۔ عبادت کا آغاز آدھی رات کو ہوا اور لوگوں کی بڑی تعداد گرجا گھروں میں جمع ہوئی۔
کراچی کے سینٹ پیٹرک چرچ میں دعائیہ تقریب کا اہتمام کیا گیا جس میں مسیحی برادری کے لوگوں کی بڑی تعداد نے شرکت کی۔
ملک بھر کی طرح پشاور میں بھی کرسمس کے موقع پر گرجا گھروں اور گھروں کو خوبصورتی سے سجایا گیا ہے اور مسیحی برادری نے اپنے گھروں کو کرسمس ٹری سے سجایا۔
صدر آصف علی زرداری اور وزیر اعظم شہباز شریف نے کرسمس کے موقع پر پاکستان اور دنیا بھر میں مقیم مسیحی برادری کو دلی مبارکباد پیش کی ہے۔
صدر نے کہا: کرسمس کے پرمسرت موقع پر، میں پاکستان اور دنیا بھر میں اپنے مسیحی بھائیوں اور بہنوں کو دلی مبارکباد پیش کرتا ہوں۔
وزیراعظم نے بھی کرسمس کے موقع پر پاکستان اور دنیا بھر میں مسیحی برادری کو مبارکباد پیش کی۔