ورلڈ کپ سے پہلے شائقین کرکٹ کے لیے بڑا تحفہ، پاکستان بمقابلہ آسٹریلیا ٹی 20 سیریز کا اعلان،تین ٹی 20 میچز لاہور میں کھیلے جائیں گے

لاہور(ایگزو نیوز ڈیسک)پاکستان کرکٹ بورڈ(پی سی بی) نے تصدیق کی ہے کہ آسٹریلوی کرکٹ ٹیم رواں ماہ کے آخر میں پاکستان کا دورہ کرے گی۔ دونوں ٹیموں کے درمیان تین میچوں پر مشتمل ٹی 20 سیریز لاہور کے قذافی اسٹیڈیم میں کھیلی جائے گی، جو شائقین کے لیے آئی سی سی مینز ٹی 20 ورلڈ کپ 2026 سے قبل ایک سنہری موقع ثابت ہوگی۔ سیریز کا آغاز 29 جنوری سے ہوگا، جبکہ دوسرے اور تیسرے میچ بالترتیب 31 جنوری اور یکم فروری کو کھیلے جائیں گے، جس کے لیے آسٹریلوی ٹیم 28 جنوری کو لاہور پہنچے گی۔
ایگزو نیوز کے مطابق پاکستان کرکٹ بورڈ نے تصدیق کی ہے کہ رواں ماہ کے آخر میں آسٹریلوی ٹیم پاکستان کا دورہ کرے گی۔ دونوں ٹیموں کے درمیان تین میچوں پر مشتمل ٹی 20 سیریز لاہور کے قذافی سٹیڈیم میں کھیلی جائے گی، جس کا آغاز 29 جنوری سے ہوگا۔ دوسرا ٹی 20 میچ 31 جنوری اور تیسرا یکم فروری کو کھیلا جائے گا۔پی سی بی کے مطابق ہر میچ کے لیے ٹاس شام 5:30 بجے ہوگا جبکہ میچ کا آغاز شام 6 بجے سے ہو گا۔ آسٹریلوی ٹیم 28 جنوری بروز بدھ لاہور پہنچے گی تاکہ میچوں کی تیاری مکمل کی جا سکے۔یہ سیریز دونوں ٹیموں کے لیے آئی سی سی مینز ٹی 20 ورلڈ کپ 2026 سے قبل انتہائی اہمیت کی حامل ہے، جہاں پاکستان گروپ اے اور آسٹریلیا گروپ بی میں شامل ہے۔ اس سے قبل آسٹریلیا مارچ 2022 کے بعد پاکستان کا تیسرا دورہ کرے گا۔پی سی بی کے چیف آپریٹنگ آفیسر سمیر احمد نے کہا کہ ہم آسٹریلیا کی ٹی 20 سیریز کے لیے میزبانی پر پرجوش ہیں اور یہ سیریز پاکستانی شائقینِ کرکٹ کے لیے سال کے آغاز کا بہترین تحفہ ثابت ہوگی۔ انہوں نے مزید کہا کہ شائقین لاہور میں عالمی معیار کی کرکٹ دیکھنے کے لیے بے صبری سے منتظر ہیں۔