اسلام آباد (سپورٹس رپورٹر) پاکستان سپورٹس بورڈ (پی ایس بی) نے ملک میں “پیڈل” کے کھیل کی باقاعدہ سرپرستی کا آغاز کرتے ہوئے پاکستان پیڈل فیڈریشن کے الحاق کی منظوری دے دی ہے۔
ایگزو نیوز کے مطابق پاکستان سپورٹس بورڈ نے ملک میں پیڈل کھیل کے فروغ کے لیے ایک اہم قدم اٹھاتے ہوئے پاکستان پیڈل فیڈریشن کے الحاق کی باضابطہ منظوری دے دی ہے، جسے قومی کھیلوں کے ڈھانچے میں ایک اہم پیش رفت قرار دیا جا رہا ہے۔یہ فیصلہ پاکستان سپورٹس بورڈ کے 36 ویں اجلاس میں کیا گیا،جس کے بعد جاری کیے گئے نوٹیفکیشن میں فیڈریشن کی عبوری قیادت کا بھی اعلان کر دیا گیا ہے۔ نوٹیفکیشن کے مطابق اسکواش کے عالمی شہرت یافتہ لیجنڈ جہانگیر خان کو پاکستان پیڈل فیڈریشن کا صدر جبکہ معروف صحافی اور اینکر پرسن منصور علی خان کو سیکرٹری جنرل تسلیم کیا گیا ہے۔
بورڈ کی جانب سے ہدایت کی گئی ہے کہ نو تشکیل شدہ فیڈریشن آئندہ 90 روز کے اندر کمپنیز ایکٹ کے تحت اپنی رجسٹریشن مکمل کرے اور ساتھ ہی بین الاقوامی پیڈل فیڈریشن کے ساتھ الحاق کے لیے فوری اقدامات کرے تاکہ اس کھیل کو عالمی سطح پر بھی نمائندگی حاصل ہو سکے۔اس اقدام کو ملک میں پیڈل ٹینس کے فروغ کی جانب ایک اہم سنگ میل قرار دیا جا رہا ہے،جس کے ذریعے نہ صرف اس کھیل کو ادارہ جاتی سرپرستی حاصل ہوگی بلکہ نوجوان کھلاڑیوں کو بھی اپنی صلاحیتیں منوانے کے بہتر مواقع میسر آئیں گے۔ماہرین کے مطابق حکومتی سطح پر سرپرستی ملنے کے بعد پیڈل کھیل پاکستان میں تیزی سے مقبول ہو سکتا ہے جبکہ منظم ڈھانچے کے تحت ٹیلنٹ کی تلاش اور تربیت کے عمل کو بھی موثر بنایا جا سکے گا،جو مستقبل میں بین الاقوامی مقابلوں میں ملک کی نمائندگی کے لیے اہم ثابت ہوگا۔