پاکستان اور سعودی عرب نے عازمین حج کی سہولت کیلئے سالانہ حج معاہدے 2025 پر دستخط کر دیے۔
معاہدے پر دستخط وفاقی وزیر برائے مذہبی امور و بین المذاہب ہم آہنگی چوہدری سالک حسین اور سعودی وزیر حج و عمرہ ڈاکٹر توفیق بن فوزان الربیعہ نے ایک تقریب کے دوران کیے۔
معاہدے کے تحت اس سال پاکستان سے 179,210 عازمین حج ادا کریں گے۔ اس بات پر اتفاق کیا گیا ہے کہ پاکستانی حجاج کو بہترین ممکنہ سہولیات فراہم کی جائیں گی، جنہیں منیٰ میں رعایتی نرخوں پر خصوصی رہائش بھی فراہم کی جائے گی۔
سعودی وزیر حج و عمرہ نے پاکستانی حکام کو عازمین حج کو بہتر سہولیات فراہم کرنے کے لیے ہر ممکن تعاون کی یقین دہانی کرائی ہے۔
مزید برآں 20 سے 25 دن کا مختصر حج پروگرام متعارف کرانے کا بھی فیصلہ کیا گیا ہے۔ حجاج کرام کو چار سے آٹھ دن کی مدت کے لیے مدینہ میں اپنی رہائش کا انتخاب کرنے کا اختیار ہوگا۔
وزارت مذہبی امور نے کہا کہ عازمین کو پاکستانی پرچم، شناختی کوڈ اور دیگر معلومات والے خصوصی طور پر ڈیزائن کیے گئے بیگ فراہم کیے جائیں گے۔
دریں اثناء وفاقی وزیر چوہدری سالک حسین سعودی وزارت حج کے زیر اہتمام جدہ میں چار روزہ بین الاقوامی حج کانفرنس اور ایکسپو میں بھی شرکت کریں گے۔