پاکستان میں پولیو کے مزید تین کیسز رپورٹ ہوئے ہیں، جس سے 2024 میں کیسز کی کل تعداد 59 ہوگئی ہے۔
نیشنل ایمرجنسی آپریشن سینٹر برائے انسداد پولیو کے مطابق، نئے رپورٹ ہونے والے کیسز ڈیرہ اسماعیل خان، کیماڑی اور کشمور سے سامنے آئے ہیں۔ تمام متاثرہ بچوں میں وائلڈ پولیو وائرس ٹائپ 1 کا ٹیسٹ مثبت آیا۔
پولیو کے 26 کیسز کے ساتھ بلوچستان سرفہرست ہے، اس کے بعد خیبرپختونخوا 16، سندھ 15، پنجاب ایک اور اسلام آباد میں ایک ہے۔
صحت کے حکام ویکسینیشن مہم اور عوامی آگاہی کے اقدامات کے ذریعے وائرس کے پھیلاؤ سے نمٹنے کے لیے اپنی کوششیں جاری رکھے ہوئے ہیں۔ پاکستان میں پولیو کے کیسز میں حالیہ اضافے نے بین الاقوامی اداروں کے لیے تشویش کو جنم دیا ہے۔ ذرائع کے مطابق عالمی ادارے نے پاکستان سے ہنگامی اقدامات پر عملدرآمد کا مطالبہ کیا ہے۔ پاکستان نے عالمی اداروں کو پولیو پر قابو پانے کے لیے فوری اقدامات کرنے کی یقین دہانی کرائی ہے۔
مزید برآں، پولیو وائرس سے نمٹنے کے لیے کام کرنے والی یہ تنظیمیں ممکنہ طور پر اس ماہ کے آخر میں پاکستان آئیں گی۔