گلوبل ٹیرر ازم انڈیکس 2025 کی رپورٹ کے مطابق، پاکستان عالمی دہشت گردی سے متاثرہ 163 ممالک میں دوسرے نمبر پر ہے۔
رپورٹ کے مطابق پاکستان میں دہشت گردی کے واقعات میں حالیہ برسوں میں اضافہ ہوا ہے، اور اس وقت عالمی سطح پر دہشت گردی سے سب سے زیادہ متاثرہ ممالک میں پاکستان کا نمبر دوسرا ہے۔ پہلی پوزیشن برکینا فاسو کے پاس ہے، جب کہ تیسرے نمبر پر شام، چوتھے پر مالی، اور پانچویں نمبر پر نائجر ہے۔
رپورٹ میں یہ بھی بتایا گیا ہے کہ طالبان کے افغانستان میں اقتدار میں آنے کے بعد پاکستان میں دہشت گردی کی سرگرمیاں بڑھ گئی ہیں۔ پاکستان نے متعدد بار طالبان حکومت سے یہ مطالبہ کیا ہے کہ افغانستان کی سرزمین پاکستان کے خلاف استعمال نہ ہو۔
گزشتہ روز سیکیورٹی فورسز نے پاک افغان سرحد پر غیر ملکیوں کی دراندازی کی کوشش ناکام بناتے ہوئے 16 دراندازوں کو ہلاک کر دیا۔ پاکستان بار بار افغان حکومت سے موثر سرحدی انتظامات کا مطالبہ کر رہا ہے تاکہ دہشت گردی کو روکنے کے لیے بہتر اقدامات کیے جا سکیں۔
گورنر خیبر پختونخوا فیصل کریم کنڈی نے کہا کہ پاکستان میں ہونے والی دہشت گردی کے پیچھے افغانستان کی سرزمین کا استعمال ہو رہا ہے، اور نیٹو کا چھوڑا ہوا اسلحہ پاکستان کے خلاف استعمال ہو رہا ہے۔