پاکستان اور ملائیشیا تعلقات کے نئے دور میں داخل،شہباز شریف اور انور ابراہیم کا ٹیکنالوجی،معیشت اور عوامی روابط بڑھانے پر اتفاق

کوالالمپور (ایگزو نیوز ڈیسک)وزیراعظم پاکستان شہباز شریف نے کہا ہے کہ پاکستان ملائیشیا کے ساتھ مشترکہ منصوبوں اور دوطرفہ مفاد پر مبنی تعاون کے ذریعے تعلقات کو نئی بلندیوں پر لے جانا چاہتا ہے تا کہ دونوں ممالک اپنی مہارتوں اور تجربات کو ایک دوسرے کے فائدے کے لیے بروئے کار لا سکیں۔
ایگزو نیوز کے مطابق کوالالمپور میں اپنے ملائیشین ہم منصب انور ابراہیم کے ہمراہ مشترکہ پریس کانفرنس کرتے ہوئے وزیراعظم شہباز شریف نے کہا کہ “یہ میرا ملائیشیا کا پہلا سرکاری دورہ ہے لیکن یہاں پہنچ کر ایسا لگا جیسے ہم  اپنے ہی لوگوں کے درمیان ہیں،یہاں کے چہرے مانوس اور دل گرم جوش ہیں،جیسے برسوں پرانا خاندانی رشتہ ہو۔انہوں نے بتایا کہ دونوں ممالک کے درمیان انتہائی مثبت اور نتیجہ خیز مذاکرات ہوئے،جن میں دوطرفہ تعلقات کے ساتھ ساتھ علاقائی اور عالمی امور پر بھی بات چیت کی گئی۔شہباز شریف نے کہا کہ تقریباً تمام اہم معاملات پر پاکستان اور ملائیشیا کا موقف یکساں ہے،پاکستان ٹیکنالوجی،مصنوعی ذہانت اور اقتصادی ترقی کے دیگر شعبوں میں ملائیشیا کے تجربات سے سیکھنا چاہتا ہے،ہمارا مقصد صرف سیکھنا نہیں بلکہ مشترکہ منصوبوں اور تعاون پر مبنی پروگرامز شروع کرنا ہے، جہاں پاکستانی اور ملائیشین ماہرین مل کر کام کر سکیں۔انہوں نے بتایا کہ اس وقت تقریباً ڈیڑھ لاکھ پاکستانی ملائیشیا میں آباد ہیں جو وہاں کی معیشت اور ترقی میں اہم کردار ادا کر رہے ہیں،یہ ہمیں امید دلاتے ہیں کہ ہم اپنے امکانات کو ایک دوسرے کے ساتھ جوڑ کر مشترکہ ترقی کی راہ پر گامزن ہو سکتے ہیں۔

اس موقع پر وزیراعظم شہباز شریف نے انور ابراہیم کی کتاب ” سکرپٹ “ کے اردو ترجمے کا بھی افتتاح کیا۔انہوں نے کہا کہ یہ کتاب پائیداری،تحقیق اور ترقی کے وژن پر مبنی ہے اور اس کا پیغام آنے والی نسلوں تک پہنچے گا۔ملائیشین وزیراعظم انور ابراہیم نے شہباز شریف کو اپنا ”بھائی“ قرار دیتے ہوئے کہا کہ پاکستان نے ماضی میں سائنس، ٹیکنالوجی،انجینئرنگ اور ریاضی کے شعبوں میں نمایاں ترقی کی تھی،جسے دوبارہ زندہ کیا جا سکتا ہے۔ انہوں نے کہا کہ اب جبکہ ملائیشیا میں استحکام آ چکا ہے،ہم پاکستان کے ساتھ آئی ٹی،سائنس اور دیگر شعبوں میں مزید تعاون کے خواہاں ہیں۔انہوں نے فلسطین کے معاملے پر پاکستان کے واضح اور اصولی موقف کو بھی سراہا اور کہا کہ اسرائیلی جارحیت کے خلاف دونوں ممالک کا موقف یکساں ہے،جو آج دنیا کے بیشتر ممالک کا بھی موقف بن چکا ہے۔

قبل ازیں وزیراعظم شہباز شریف کو پتراجایا کے پردانا پترا کمپلیکس میں گارڈ آف آنر پیش کیا گیا۔وہ اتوار کو ملائیشیا کے سرکاری دورے پر پہنچے تھے،جہاں ان کا استقبال وزیر اطلاعات و مواصلات فیہمی فاضل،پاکستان کے ہائی کمشنر سید احسن رضا شاہ اور سفارتی عملے نے کیا۔وزیر اعظم ہاوس  کے مطابق اس دورے کے دوران تجارت،آئی ٹی،ٹیلی کام،حلال انڈسٹری،سرمایہ کاری،تعلیم،توانائی،انفراسٹرکچر اور ڈیجیٹل معیشت جیسے شعبوں میں تعاون بڑھانے کے لیے معاہدوں اور مفاہمتی یادداشتوں پر دستخط کیے جائیں گے۔اس کے ساتھ ساتھ عوامی سطح پر روابط کو مزید مضبوط بنانے اور دونوں ممالک کے درمیان نئے مواقع تلاش کرنے پر بھی اتفاق رائے ہوا ہے۔